Aýyz sý baǵdarlamasy «Bermýd úshtaǵany» sııaqty, qarjy jumbaq jolmen joǵalyp ketedi - D.Nazarbaeva
"Jergilikti bılik - memlekettik basqarýdyń sheshýshi deńgeıi. Jergilikti memlekettik jáne ózin-ózi basqarý organdary halyqqa jaqyn jáne olardyń shynaıy turmysy men muqtajyn jaqsy biledi dep senemiz. Óńirlerde oryn alǵan problemalardy túsinip otyr. Bizdiń ortalyqta nemese jergilikti jerde bolsyn múddemiz bir. Maqsat - jergilikti deńgeıdegi memleketttik jáne ózin-ózi basqarý tıimdiligin arttyrý", - dedi ol.
Darıǵa Nazarbaevanyń atap ótýinshe, elimizde júrgizilgen ákimshilik reforma jergilikti bılikke edáýir ókilettik berdi. Atap aıtqanda aýyl, kent, aýyldyq okrýg jáne aýdandyq mańyzy bar qalalarda jergilikti ózin-ózi basqarýdyń derbes bıýdjetin qalyptastyrý, kommýnaldyq menshikti óz aldyna basqarý, jer resýrstaryn basqarý salasyn baqylaý, lıtsenzııalaý, atestattaý, baqylaý jáne basqa da qyzmet túrleri berildi.
"Bylaı qaraǵanda bári qalypty jáne oıdaǵydaı sekildi. Al is júzinde qalaı? Búgingi pikir almasý jergilikti basqarý jumysynyń máni men mazmuny týraly bolýy tıis. Respýblıkalyq, oblystyq jáne jergilikti damý baǵdarlamalaryn iske asyrýdy qaǵaz júzinde emes naqty is arqyly qalaı bir júıege keltirýge bolady? Ákimdermen qarym-qatynas tıimdi bolýy úshin ne kerek? Baqylaý qyzmetin iske asyrý jaǵynan qarastyrý qajet. Máslıhat qyzmetin qajetti mazmunmen tolyqtyrýǵa jáne jergilikti ózin-ózi basqarý jumysyn jetildirýge ne jetispeı jatyr? Osy máseleni keńinen talqylaıyq. Eger quqyq belgileý qujattarynda zańnamalyq aktilerde bári durys jazylǵan bolsa, nege adamdar joǵarydan kómek suraıdy, ádildik pen qorǵaýdy nege Astanadan izdeıdi?", - dedi Senat tóraǵasy.
Spıkerdiń dereginshe, aýyldyq okrýgterdiń 95 paıyzy dotatsııalyq jáne joǵaryda turǵan bıýdjetterden alynatyn transferttermen qarjylandyrylady.
"Bul degenińiz jyl saıyn 98 mlrd teńgege jýyq qarjy. Al nátıje qandaı? Ol adamdardyń turmys deńgeıine oń áseri etti me? Jumys orny kóbeıdi me? Álde sol qarjy qurdymǵa ketti me? Nelikten keıbir jerlerde suranys bolmasa da kópqabatty úıler nemese sáýletti mektep ǵımaraty salynyp jatyr? Shynyna kelgende sol óńirde úsh aýysymda jumys jasap jatqan mektepter az emes. Óńirlerdi aýyz sýmen qamtamasyz etý úshin táýelsizdik alǵaly 540 mlrd teńgeden astam qarjy jumsaldy. Biraq, kóptegen eldi mekenderde halyq taza aýyz sýǵa qol jetkize almaı keledi. Osy aýyz sý baǵdarlamasy "Bermýd úshtaǵany" sııaqty, qarjy jumbaq jolmen joǵalyp ketedi. nelikten? ", - dedi Darıǵa Nazarbaeva.
