Aýyt Muqıbek: Májilistiń VІІ shaqyrylymynan halyqtyń úmiti zor
«Parlament saılaýy zańǵa sáıkes óz ýaqytynda ótkeli jatyr. Bul – óte jaqsy jańalyq. Mundaı saılaýdyń kezekten tys ótýi halyqtyń narazylyǵyna ushyrap kelgeni belgili. Endi VІІ shaqyrylymnan halyqtyń kútip otyrǵan úmiti óte zor. Májiliske qatysty qazir halyq kóp shyn pikir aıtyp jatyr. Sebep, ondaǵy jasy ulǵaıyp ketken adamdar kóp. Ózderiniń jeke kásipkerligin qorǵaý úshin kelgender de az emes. Odan qalsa, qyzmetten bosaǵan eks-memlekettik qyzmetkerlerdiń de Parlamentke kelip otyra qalady. Sodan baryp Májilistiń sapasy tómendep, kemeldi zań qabyldaýǵa áserin tıgizedi. Kemeldi zań qabyldanbaǵandyqtan, ekonomıkamyz aldyǵa jyljymaı tur. Pandemııa kezinde halyq sapasyz zańdardyń kesirinen kóp zııan tartty. Sol sebepti bul shaqyrylymǵa jańa tulǵalar men jańa kásibı mamandar kóp kelýi kerek», - dedi Aýyt Muqıbek QazAqparat tilshisine telefon arqyly bildirgen pikirinde.
Ulttyq keńes múshesiniń aıtýynsha, Parlament Májilisine aldaǵy ýaqytta enetin oppozıtsııalyq partııalar – shyn mánindegi oppozıtsııalyq partııa bolýy kerek.
«Oppozıtsııa degen qoldan jasalmaýy tıis. Bizde oppozıtsııa dese boldy – tóńkeris jasaıtyn, búldirip, memlekettiń baǵytyn basqa jaqqa alyp ketetin sııaqty bolyp kórinedi. Olaı emes! Oppozıtsııa degen erkin pikirli ári oıyn ashyq aıtatyn adam degen sóz. Oppozıtsııa da maman bolýy kerek. Qudaıǵa shúkir, 30 jyldyń ishinde olar da tárbıelendi, tájirıbe jınady. Belgilengen reglament pen qabyldanǵan zańnan asyp eshkim de jumys jasamaıdy. Bul – bir. Ekinshiden, Májilistiń quramynda kópbalaly analar, jastar, áıelder sekildi áleýmettik toptyń ókilderi bolatyn boldy. Bul da jaǵymdy jańalyq. Osy jerde jáne bir mańyzdy áleýmettik top eskerilmeı jatqan sekildi. Muny Elbasy aıtyp edi. Bul – shetten kelgen aǵaıyndardyń ókili. Qandastarǵa belgili bir dárejede múmkindik berý kerek», - dep Aýyt Muqıbek praımerızge qatysqanyn, tájirıbe jınap, saıası ómirge tipti de ishkerleı aralasqanyn qýana atap ótti.
«Praımerızde elektoraty kóp adamdar daýystyń kóbin alyp ketti. Máselen, rektorlar. Búkil muǵalimder, oqytýshylar partııa múshesi boldy da, joǵary daýysqa JOO basshylary ıe boldy. Ekinshiden kásipkerler men bas dárigerler. Olardyń da qol astyndaǵy qyzmetkerleri kóp. Shetten kelgen aǵaıyndardyń elektoraty joqtyń qasy. Olardyń kóbi partııaǵa múshe emes. Óte az. Soǵan qaramastan 2-3 myńǵa deıin daýys jınaǵan qandastarymyz bar. Osy saılaýda solardyń úni eskerilse degen úmittemin. Sebebi kóshi-qon – Elbasynyń saıasaty. Ol eshqashan toqtamaıdy. Onyń, kerek deseńiz, ekinshi altyn dáýiri bastalaıyn dep tur. Pandemııa toqtap, kórshi elderdegi saıası jaǵdaılar turaqtalsa, shekara ashylsa, Qazaqstanǵa lap etip mıllıondaǵan qazaq kelgeli tur», - dedi qoǵam qaıratkeri.
Aýyt Muqıbek 30 jyldan beri kósh qarqynynyń óz deńgeıinde bolmaýynyń bir sebebin zańnyń ala-qulalyǵynan kóredi. Onyń aıtýynsha Parlamentte sol máseleni biletin depýtattar bolýy tıis.
«Kóshtiń saıabyrlaǵannyń syrtynda, kelip alǵan qandastardyń qujattanýdaǵy kedergilerden kórgen qıyndyǵy da az bolǵan joq. Sondyqtan kem degende Parlament Májilisinde 2 depýtat qandastardyń qatarynan bolýy kerek dep esepteımin. Bul sózsiz eskerilýi kerek. Aldaǵy saılaýda osy másele sheshilse eken dep úmittenemin», - dep túıdi Aýyt Muqıbek.
Eske sala ketsek búgin Memleket basshysy Qasym-Jomart Toqaev QR Parlamenti Májilisi jáne máslıhat depýtattary saılaýyn taǵaıyndaý týraly úndeý jarııalaǵan bolatyn.
«Búgin men Parlament Májilisi depýtattarynyń saılaýyn taǵaıyndaý týraly Jarlyqqa qol qoıdym. Ortalyq saılaý komıssııasynyń qaýlysymen barlyq deńgeıdegi máslıhat depýtattarynyń saılaýy taǵaıyndalady. Aldaǵy saılaý konstıtýtsııalyq merzimge sáıkes, 2021 jyldyń 10 qańtarynda ótedi. Barlyq saıası partııalardyń bul saılaý naýqanyna qatysýǵa daıyndalýyna, saılaý aldyndaǵy platformasyn ázirleýine, partııalyq ınfraqurylymdardy jetildirýine ýaqyty jetkilikti boldy», - dedi Prezıdent úndeýinde.
