Aýyr júk tıelgen kólikti kórgen turǵyndar qaıda shaǵymdana alady
NUR-SULTAN. QazAqparat -Kólik komıteti aýyr júk tıegen kólikti kórgen azamattarǵa arnap arnaıy jeli ashty, dep habarlaıdy QazAqparat.
«Avtokólik joldaryn paıdalaný talaptaryn saqtaýdy qamtamasyz etý úshin, Kólik komıtetiniń ahýaldyq ortalyǵynda senim telefony men messendjerler jumys isteıdi. Oǵan táýliktiń kez kelgen ýaqytynda júgi aýyr avtokólik quraldarynyń avtomobıl joldarymen júrip ótkeni týraly habarlama jiberýge bolady», - delingen komıtettiń habarlamasynda.
Vedomstvonyń habarlaýynsha, elimizdiń kez kelgen azamaty normadan tys júk tıegen kólikti kórse, + 7 708 0880800 nómiri boıynsha «Whatsapp» nemese «Telegram» messendjerlerine beınehabarlama jibere alady.
Jiberiletin habarlamada kóliktiń memlekettik nómiri, ótý ornyn, avtojol ýchaskesi, jaqyn eldimeken, aýyr júk tıegen kóliktiń júrip ótken kúni men ýaqyty mindetti túrde kórsetilýi qajet.
Qosymsha suraqtar boıynsha Ahýaldyq ortalyqtyń 8 (7172) 983535 senim telefonyna táýlik boıy habarlasýǵa bolady.
Eske sala ketsek, ótken aıdyń sońynda «Qazjol ǴZI» AQ prezıdenti Baǵdat Teltaev jolda bilikterine normadan artyq salmaq túsirip, júre beretin aýyr júk kólikteriniń qyzmetine qatysty másele kótergen bolatyn.
«Avtokólik joldarynyń beriktigin saqtaýy, jobalanǵan merzimde qyzmet kórsetý, avtokólik joldaryna túsetin júkteme máselesi bizdi tolǵandyrý kerek. Men bir anyqtama bergeli otyrmyn: árbir avtokólik jolynyń tósemesiniń qurylymy beriktikke synalady. Avtokólikterdiń belgili bir biliginiń ótýiniń (mysaly birneshe mıllıon) sany sanalady. Qarap otyrsańyzdar, birneshe bilikti, qos bilikti kólikter, biligine kóp júkteme túsetin kólik túrleri jolymyzda júrip jatyr. Osyndaı aýyr júkti kólikterdiń saldarynan joldarymyzdyń qyzmet kórsetý ýaqyty tómendep ketýi múmkin», - degen edi Baǵdat Teltaev OKQ-da ótken baspasóz máslıhatynda.
