Aýyr jaraqattanǵan Brazılııa prezıdenttigine úmitker saılaý naýqanynda alda keledi
ASTANA. QazAqparat - Ótken aptada qastandyq saldarynan aýyr jaraqat alǵan ulttyq parlamenttiń depýtaty, Brazılııa prezıdenttigine úmitker Jaır Bolsonarý saılaý jarysynda favorıt bolyp otyr. Buǵan dúısenbi kúni keshkisin jarııalanǵan Datafolha áleýmettik ortalyǵynyń saýalnama derekteri dálel, dep habarlaıdy QazAqparat.
Sotsıal-lıberaldyq partııanyń atynan qatysyp jatqan Bolsonarýǵa saılaýdyń birinshi týrynda saılaýshylardyń 24% daýys berýge nıetti. Tamyz aıynyń sońynda júrgizilgen saýalnama barysynda depýtatty 22% brazılııalyq qoldaýǵa daıyn boldy. Zertteý 10 qyrkúıekte eldiń 197 mýnıtsıpalıtetinde júrgizildi. Oǵan 2804 adam qatysty.
Bul reıtıngte ekinshi oryndy Demokratııalyq trabalıstik partııadan Sırý Gomes (13%) ıelense, úshinshi orynda - Rede jasyl oppozıtsııalyq partııasynyń kóshbasshysy Marına Sılva tur. Oǵan turǵyndardyń 11%-y daýys berýge nıetti.
Eske sala ketsek, ótken beısenbide Bolsonarýdy eldiń ońtústik-shyǵysynda Mınas-Jeraıs shtaty Jýız-dı-Fora qalasynda saılaýshylarmen kezdesý kezinde pyshaqtaǵan. Shabýyl jasaýshy oqıǵa ornynda ustaldy.
Brazılııada jalpyǵa ortaq saılaý 7 qazanda ótedi. Saılaýaldy naýqany 15 tamyzda bastaldy.
