Aýyr salmaqty kólikterdiń qozǵalysyna jazda shekteýler engiziledi
ASTANA. QazAqparat - Jeke bilikke 8 tonnadan astam júkteme túsetin aýyr salmaqty kólikterdiń qozǵalysyna jazǵy kezeńge shekteýler qoıylady.
«Jalpy paıdalanymdaǵy respýblıkalyq mańyzy bar avtomobıl joldarynyń betki jabyndysyn saqtaý maqsatynda Kóliktik baqylaý komıteti organdary aýa temperatýrasy 25°S asqan kezde jeke bilikke 8 tonnadan astam júkteme túsiretin avtokólik quraldarynyń (AKQ) qozǵalysyna shekteýler engizedi»,- delingen QR KKM málimetinde. Qozǵalys shekteýleri 1 maýsymnan 31 tamyz aralyǵy kezeńine Almaty, Atyraý, Jambyl, Qaraǵandy (Jezqazǵan óńiri), Qyzylorda, Ońtústik Qazaqstan jáne Mańǵystaý oblystarynda engiziledi. Sondaı-aq Aqmola, Aqtóbe, Shyǵys Qazaqstan, Batys Qazaqstan, Qaraǵandy (Qaraǵandy óńiri), Qostanaı, Pavlodar jáne Soltústik Qazaqstan oblystarynda mundaı shekteý 1 maýsymnan 15 tamyz aralyǵynda kúshinde bolady. KKM Kóliktik baqylaý komıteti tóraǵasynyń orynbasary Bolat Smaǵulynyń aıtýynsha, osyndaı shekteýler jyl saıyn jazǵy kezeńde joldyń joǵarǵy tósemin saqtaý maqsatynda engiziledi, óıtkeni aýa temperatýrasy 25°S asqan kezde qyzǵan asfalt salmaq júktemesine sezimtal keledi. Sol sebepti aýyr salmaqty kólik júrip ótkende jol jamylǵysyn buzyp ketýi yqtımal. Qozǵalys shekteýleri tún mezgilinde engizilmeıtindigin atap ótken jón. Shekteýler ońtústikte saǵat 10:00-den 22:00-ge deıin, al soltústik jáne ortalyq oblystarda 11:00-den 21:00 aralyǵynda qoıylady.
