Aýyr salmaqta da básekelestik bar -Egemen Qazaqstan
ASTANA. QazAqparat - «Egemen Qazaqstan» gazetiniń 2018 jylǵy 5 aqpandaǵy sanynda áýesqoı bokstan asa aýyr salmaqtaǵy Ulttyq quramanyń boksshysy Qamshybek Qońqabaevtyń suhbaty jarııalandy.
«Aýyr salmaqta da básekelestik bar» atty suhbatta boksshy: «2017 jyly ózimniń eń alǵashqy Azııa jáne álem chempıonatyna qatystym. Jáı qatysyp qana qoımaı, elime kúmis júlde syıladym. Barlyǵyna eńbegimizdiń, tókken terimiz ben bapkerlerimizdiń aıtqan aqylynyń arqasynda jettik. Keıde, shirkin, sol birinshilikterde elimniń ánuranyn shyrqatqanda ǵoı, dep ishteı qynjylyp qalamyn. Buıyrsa, aldaǵy chempıonatta osy qatelikterimdi túzetip, kók týymyzdy bıikte kóterý úshin barymdy salamyn. Asa aýyr salmaqqa endi ǵana boı úıretip kelemin»,- dedi.
Osy nómirde gazet jýrnalısi Súleımen Mámettiń «Babalar sózi eldiktiń kózi» atty maqalasy jaryq kórdi. Onda jýrnalıst: «Jurt bolyp jumylýdyń, ult bolyp uıysýdyń úlgisin babalardan qalǵan sózderdi estip, ónegeni jazbalardan oqyp otyrǵanda kóz jetkizesiń. Ásirese, qazaqtyń tórt qubylasyn túgendep, kemin toltyryp, ketigin bitep otyrǵan, bir ananyń, bir ákeniń tete ulyńdaı úsh bıdiń ónegesin tý etip tóbeńe kóterseń, kókeıińe shyraq etip jaǵyp júrseń, aldyńǵynyń aqyl-parasatyn qarynnyń qamy demeı, kóńilińnen ketirmeı, qaraýyldaı baǵa bilseń - bereke birlik saltanat quryp, utylmaıdy ekensiń»,- degen oı aıtady.
Respýblıkalyq basylymnyń jańa sanynda túrli taqyryptardy qamtyǵan «Túıtkili kóp teri óńdeý óndirisi», «PIK ketse, MIK keledi», «Ǵaımoldınniń ǵajaıyp álemi» syndy maqalalar jarııalandy.
