Aýyr salmaqqa aýyssam, jurt meni Golovkınnen qoryqty deýi múmkin - A. Ýord
ASTANA. 27 jeltoqsan. QazAqparat - 29 jastaǵy amerıkalyq boksshy Andre Ýord orta salmaq dárejesinde qarsylasy bolmaǵanyna qaramaı, aýyr salmaqqa aýysýǵa asyǵar emes,
dep habarlaıdy Baq.kz
«Ekinshi orta salmaqta áli 2 nemese 3 kezdesý ótkizýim kerek. Bul salmaqta áli eńserýim tıis úlken belester bar. Óz salmaǵymda qarsylasym joqtyǵyna qaramaı, ázirge jartylaı aýyr salmaqqa ótpeımin, ótken kúnniń ózinde oǵan tyńǵylyqty daıyndalýym kerek. Sheberlik turǵysynan emes, shymyrlyq turǵysynan. Oǵan qosa, qazir jartylaı aýyr salmaqqa ótip ketsem, adamdar meni Golovkınnen qorqyp qashty dep aıtýy múmkin. Al ekinshi orta salmaqta qalyp qoısam, 79 kelidegi boksshylardan qoryqty dep aıtady. Sondyqtan, qandaı sheshim qabyldasań da adamdarǵa jaqpaısyń. Aldaǵy mansabymdy qalaı jalǵastyratynymdy ózim sheshemin», - deıdi A.Ýord.
25 jeltoqsan kúni amerıkanyń bedeldi ESPN sport telearnasy jasaǵan saraptamasy boıynsha, Golovkın men Ýordtyń jekpe-jegi 2014 jyly álem asyǵa kútken 12 kezdesýdiń biri bolyp otyr.
Al Amerıkanyń Bleacher Report sport saıty Jańa jyl qarsańynda jarııalaǵan «2014 jyly boks áleminde bolatyn ózgerister» atty maqalasynda 2014 jyly joly bolǵaly turǵan áıgili kásibı boksshylardyń attaryn ataǵan edi. Amerıkalyqtar jerlesimiz Gennadıı Golovkınniń kezdesýlerinen tek jeńister kútetinin jazǵan bolatynbyz.
Jalpy, 2013 jyl Gena úshin óte sátti jyl boldy. Orta salmaqtaǵy WBA chempıony bir jylda 4 kezdesý ótkizip, barlyq qarsylasyn nokaýtpen jeńdi. Ázirge Andre Ýordtyń kókeıinde ne júrgenin bir Alla biledi. Aýyr salmaqqa aýysa ma, joq álde Golovkındi kúte me - bul onyń óz sharýasy. Tek, Genamen jekpe-jek ótkizetini naqtylanyp jatsa, Stıvens sııaqty astamshylyqqa berilip, artynan masqara bolyp qalmasa eken deımiz.
