Aýyr naýqastanǵan aqmolalyqtardy dárigerge qutqarýshylar jetkizýde
KÓKShETAÝ. QazAqparat - Aqmola oblysynyń qutqarýshylary qar qursaýynda qalǵan aýyr naýqastardy evakýatsııalaýdy jalǵastyrýda, dep habarlaıdy QazAqparat tilshisi óńirlik Tótenshe jaǵdaılar departamentine silteme jasap.
Vedomstvonyń málimeti boıynsha, bıylǵy qańtarda túsken qardyń mólsheri rekordtyq deńgeıge jetti. Osynyń saldarynan óńirdegi ondaǵan eldi mekenniń joldaryn qar basyp qaldy.
Jergilikti atqarýshy organdar, qutqarýshylar, tártip saqshylary, jol qyzmetiniń ókilderi jáne eriktiler sońǵy bes táýlik boıy joldardy qardan tazartyp, trassada qalǵan adamdar men tehnıkalardy qutqarýda.
Ásirese, shuǵyl dárigerlik kómek qajet naýqastar aýrýhanaǵa qutqarýshylardyń kómegimen jetkizilýde. Máselen, Atbasar aýdanynda bir táýliktiń ishinde aýyr syrqatqa shaldyqqan tórt adam evakýatsııalandy.
«28 qańtarda Sepe jáne Novo-Marınovka aýyldarynda turǵyndarǵa medıtsınalyq kómek qajettigi týraly aqparat tústi. Aýyldan shyǵar joldardy qar basyp qalǵandyqtan naýqastardy Atbasar qalasyndaǵy aýrýhanaǵa jetkizý boıynsha apattyq-qutqarý jumystary qolǵa alyndy. Shaqyrý boıynsha qutqarýshylar «Trıkol» jol talǵamaıtyn avtokóligimen baryp, «dıstsırkýlıatorlyq entsefalopatııa», «júrek talmasy», «ókpe qabynýy», «appendıtsıt» dıagnozymen naýqastardy qar qursaýyndaǵy aýyldan alyp shyqty. Olardy «Atbasar-Sochınsk» jolynda jedel-járdem qyzmetiniń brıgadasy kútip aldy», - dedi Atbasar aýdandyq tótenshe jaǵdaılar bóliminiń bastyǵy Erbolat Áshkenov.
Osy rette, Sepe aýylynyń turǵyny Anna Skıba shuǵyl medıtsınalyq kómek qajet bolǵan jubaıyna qol ushyn sozǵan qutqarýshylarǵa sheksiz alǵysyn bildirdi.
Eske sala keteıik, osyǵan deıin habarlaǵanymyzdaı, Aqmola oblysynda 845 adam men 556 kólik qar qursaýynan shyǵaryldy.
