Aýyr qylmys jasap, izdeýde júrgen Reseı azamaty Qazaqstannan ustaldy
NUR-SULTAN. QazAqparat - 12-14 qazan aralyǵynda kóliktegi polıtsııa departamentiniń qyzmetkerleri «Qańǵybas» jedel-aldyn alý is-sharasyn ótkizdi, dep habarlaıdy QazAqparat.
Іs-sharanyń maqsaty - belgili bir turǵylyqty mekenjaıy, qujattary joq jáne qańǵybastyqpen aınalysatyn adamdar arasyndaǵy qylmystardyń aldyn alýǵa jáne jolyn kesýge, habar-osharsyz ketken adamdardyń ornalasqan jerin anyqtaýǵa, sondaı-aq qylmyskerlerdi izdeýge baǵyttalǵan. Bul týraly kóliktegi polıtsııa departamentiniń bastyǵy Ońal Bekeev aıtty.
Onyń aıtýynsha, kólik polıtseıleri jolaýshy poıyzdarynda, vokzaldarda, parkter men perrondarda tekserý júrgizdi .
13 qazan kúni departamenttiń krımınaldyq polıtsııa qyzmetkerleri atalǵan is-sharany ótkizý barysynda Aqmola oblysy Şýchınsk qalasynyń temirjol vokzaly aýdanynda Reseı Federatsııasynyń 49 jastaǵy azamatyn anyqtap, ustady.
Atalǵan azamat ótken jyldyń qyrkúıek aıynan beri Reseı Federatsııasy Qylmystyq kodeksiniń 159-baby 3-bóligi ( alaıaqtyq ) boıynsha aýyr qylmys jasaǵany úshin izdeýde bolǵan. Qazir oǵan qatysty «eshqaıda ketpeý» týraly bultartpaý sharasy qabyldandy.
Sol kúni Nur-Sultan qalasynda urlyq jasaǵan 26 jáne 33 jastaǵy taǵy eki azamat ustaldy.
O. Bekeev jedel aldyn alý is-sharasy aıasynda belgili turǵylyqty jeri joq 243 adamnyń daktıloskopııalyq esepke qoıylǵanyn aıtty.
«Mundaı sharalar adamnyń qylmys jasaýǵa yqtımal qatystylyǵyn, adamnyń izdeýde júrgenin anyqtaýǵa múmkindik beredi. Turǵylyqty jeri joq adamdar arasynda izdestirilip jatqan 6 adam, onyń ishinde aýyr qylmys jasaǵany úshin izdestirilgen 3 qylmysker ustaldy. Sondaı-aq, habar-osharsyz ketken bir adam anyqtaldy», - deıdi polıtsııa polkovnıgi.
