Aýyr atletıkadan Perýde ótip jatqan Álem chempıonatynda alǵashqy rekord tirkeldi
ALMATY. 6 mamyr. QazAqparat - Perýdiń Lıma qalasynda aýyr atletıkadan qyzdar arasyndaǵy 19-shy, al erler arasyndaǵy 39-shy Álem chempıonatynyń alǵashqy jeńimpazdary anyqtaldy.
Alǵashqy medaldar toptamasy keshe áıelder arasynda 48 keli salmaq dárejesi boıynsha sarapqa salyndy. Dúbirli dodaǵa bıyl tuńǵysh ret qatysyp otyrǵan qytaılyq Chýnıan Gýan (Chunyin Guan) julqa kóterý men serpe kóterýde jáne qossaıystyń qorytyndysy boıynsha úzdik shyǵyp, Álem chempıony atandy. Kúmis jáne qola júldeni domınıkandyq Beatrıs Elızavet Pıron men úndistandyq Mırabaı Shaný Shaıkan ıelendi. Erler arasyndaǵy alǵashqy altyn medaldi 56 kelide kúsh synaǵan taǵy bir qytaılyq Hımeng Ýeı ıelendi. Sondaı-aq sáıkesinshe 2-3-shi oryn alǵan kolýmbııalyq Jon Jaıro Serna Menndoza men túrkııalyq Mýammen Sanın óz eliniń qorjynyna alǵashqy júldelerin saldy.
Halyqaralyq aýyr atletıka federatsııasynyń saıtyndaǵy aqparatqa súıensek, búgin 53 kelidegi boıjetkender arasyndaǵy saıysta Álem chempıonatynyń alǵashqy rekordy tirkeldi. Onda bolgarııalyq Alena Chıchkan chempıon, qytaılyq Lıý Tsıýan kúmis, taılandyq Tanasan ıÝtıt qola júldeger atandy.
2012 jyl Londonda qazaqstandyq Zúlfııa Chınshanlo julqa kóterýde - 131 kelini, al 2011 jyly Parıjde qossaıys qorytyndysy boıynsha 227 kelini kóterip, rekord jańartqan edi. Al serpe kóterýdegi 100 kelilik rekordty 2005 jyly Makaoda qytaılyq Jınıng Deng ornatqan bolatyn. Ázirge bul dodada joǵarydaǵy 3 rekordtyń qaısysy jańarǵany belgisiz.
