Aýyr atletıkadan ótken álem chempıonatynda Qazaqstan quramasy 4 altyn, 1 qola medal ıelendi
ALMATY. Jeltoqsannyń 1-i. QazAqparat /Erbol Azanbek/ - Ońtústik Koreıanyń Goıang-Sıtı qalasynda aýyr atletıkadan ótken álem chempıonatynda otandastarymyz 4 altyn, 1 qola medal ıelendi. Bul týraly búgin Almatyda ótken baspasóz máslıhatynda QR Aýyr atletıka federatsııasynyń ókilderi málim etti,
dep habarlaıdy QazAqparat.
Jalpy komandalyq esepte Qazaqstan quramasy 2-shi oryndy ıelengen.
«Osyǵan deıin Qazaqstannyń birde-bir ulttyq quramasy olımpıadalyq sport túrlerinen álem chempıonattarynda bundaı kólemde altyn medalǵa qol jetkizgen joq. Sondyqtan aýyr atletshilerimizdiń bul jeńisi óte úlken jetistik bolyp tabylady» deıdi QR Aýyr atletıka qaýymdastyǵynyń prezıdenti Qaırat Turlyhanov.
Qazaqstan jalaýyn jelbiretken jeńiskerlerimiz túnde saǵat 01-45-te Seýl-Almaty baǵyty boıynsha ushyp jetken bolatyn. Olardy sport súıer qaýym men aýyr atletıka qaýymdastyǵynyń ókilderi, týystary, BAQ ókilderi qarsy aldy. Esterińizge sala keteıik Álem chempıonaty qarashanyń 20-29 aralyǵynda ótken bolatyn. Qazaqstan quramasynda óner kórsetken Zúlfııa Chınshanlo, Maıa Maneza, Vladımır Sedov, Svetlana Podobedova altyn, Vladımır Kýznetsov qola medal ıelendi.
