Aýyr atletıkadan Olımpıada chempıony Svetlana Podobedova shildeniń basynda turmysqa shyqqaly jatyr
ASTANA. 17 maýsym. QazAqparat - Taldyqorǵanda shildeniń jetisinde álemniń úzdik ziltemirshi qyzdarynyń biri Svetlana Podobedova men 2009 jylǵy aýyr atletıkadan álem chempıony atanǵan Vladımır Sedovtyń úılený toıy bolady, dep habarlaıdy Vesti.kz.
London Olımpıadasynyń jeńimpazy atanǵan bilekti qyz turmysqa shyǵýǵa nıettenip júrgenin byltyr bildik. 2013 jyldyń naýryz aıynda ol toılarynyń bıyl jazda bolatynyn aıtqan. Mine, búgin naqty kúni de belgili boldy.
Sportshylar atoılatyp toı jasaýǵa qarsy. Tilshiler men bóten adamdarsyz, typ-tynysh qarapaıym toı jasamaqshy.
«Toıǵa daıyndyq aqyryndap júrip jatyr, - deıdi V.Sedov, - bul týraly kóp jazbasa eken - bul bizdiń jeke ómirimiz, oǵan aralasýdyń qajeti joq. Toıymyzda bóten adam bolmaıdy!»
25 jastaǵy V.Sedov 2009 jyly 94 kelige deıingi salmaqta álem jáne Azııa chempıonatynda top jarǵanymen, Londondaǵy sońǵy Olımpıadaǵa óte almady. Al 25 mamyrda 27-ge tolǵan S.Podobedova álemdik birinshilikte eki márte jeńimpaz atanyp úlgerdi, Azııa oıyndarynyń jeńimpazy jáne qurlyq chempıony boldy, oǵan qosa, 75 kelige deıingi salmaqta London Olımpıadasynyń altyn júldesin ıelendi.
Esterińizge sala keteıik, sáýirde taǵy bir qazaqstandyq ziltemirshi qyz Maııa Maneza aýyr atlet Vıacheslav Ershovqa turmysqa shyqqan bolatyn. Olar tipti jazdyń sońynda sábıli bolaıyn dep jatyr.
Budan bir apta buryn ǵana qazaqstandyq taǵy bir Olımpıada chempıony jeńil atlet Olga Rypakova da uldy boldy.
