Aýyr atletıkadan Qyzylordada ótip jatqan týrnırde birneshe salmaq boıynsha jeńimpazdar esimi anyqtalady
ASTANA. QazAqparat - Búgin aýyr atletıkadan Qazaqstan Respýblıkasynyń Kýbogy úshin Qyzylorda qalasynda ótip jatqan jarysta 58 jáne 63 keli salmaqqa deıingi áıelder synǵa túsedi. Al erler 62 keli salmaqta kim myqtyny anyqtaıtyn bolady.
Keshe bastalǵan bul jarys Qazaqstan Respýblıkasynyń Tuńǵysh Prezıdenti kúnine arnalyp otyr.
Qazaqstannyń aýyr atletıka federatsııasynyń málimetine súıensek, erteń, 6 jeltoqsan kúni áıelder arasyndaǵy báseke aıaqtalady. Atap aıtqanda, sportshy qyzdar 69 jáne 75 kelige deıingi jáne 75 keliden joǵary salmaqta synǵa túsedi. Al erler 69 kelige deıingi salmaq boıynsha kúsh synasady. 7 jeltoqsanda 77 jáne 85 keli salmaǵyndaǵy erler ziltermir kóterýge shyǵady. Jarystyń sońǵy kúni, 8 jeltoqsanda, bilekti de júrekti jigitter 94, 105 kelige deıingi jáne 105-ten joǵary salmaqta ózara jeńimpaz ben júldegerlerdi anyqtaıdy. 105 kelige deıingi salmaqta úzdik shyqqan ziltemirshige arnaıy syılyq tabys etilmek. Ol Qazaqstannyń álemge áıgili sportshysy, Olımpıadanyń eki dúrkin, álemniń tórt márte jeńimpazy Ilıa Ilın atyndaǵy Kýbokqa ıe bolady. Sońǵy jyldary elimizde aýyr atletıka salasy qarqyndy damyp keledi. Qazaqstan sportshylarynyń Olımpıada men álem birinshiligi jáne Azııa qurlyǵy boıynsha úzdik óner kórsetip, aıryqsha tabystarǵa jetýi jas urpaqtyń osy sport túrimen aınalysýǵa degen úlken qyzyǵýshylyǵyn týǵyzyp otyrǵany anyq. Qazir jastar men jasóspirimder arasynda kóptegen jańa esimder shyǵa bastady. Qyzylorda qalasynda ótetin Qazaqstan Respýblıkasynyń Kýbogynda da jańa esimder jarq etip shyǵady degen úmit bar. Jarystyń jabylý rásimi 8 jeltoqsanǵa josparlanǵan.
