Aýyr atletıkadan Qazaqstan rekordy jańartyldy
TALDYQORǴAN. QazAqparat – Almaty oblysynyń ortalyǵy Taldyqorǵan qalasynda aýyr atletıkadan Qazaqstan spartakıadasy ótip jatyr, dep habarlaıdy QazAqparat tilshisi.
«Jastar» sport saraıynda 4 tamyzda bastalǵan jarystyń alǵashqy kúninde áıelder arasynda - eki (45 jáne 49 keli), erler arasynda eki (55 jáne 61 keli) salmaqta jeńimpazdar men júldegerler anyqtaldy.
45 keli salmaqta áıelder arasynan Almaty oblysynyń aýyr atleti ıÝlııa Potasova chempıon atansa, ekinshi oryndy jambyldyq Aınur Ábdihalyqova jeńip aldy. Al úshinshi orynǵa Aqmola oblysynyń atleti Aıym Muhamedjanova qol jetkizdi.
49 keli salmaqtyń bas júldesin de Almaty oblysynyń ókili Natalıa Bedrık ıelense, ekinshi orynǵa Nur-Sultan qalasynan barǵan aýyr atlet Altynshash Orazbek qol jetkizdi. Úzdik úshinshi orynnan Aqmola oblysynyń sportshysy Dıana Serebrıakova kórindi.
Erler arasynda 55 keli salmaqta Almaty oblysynyń sportshysy Igor Sonǵa teń keler eshkim bolǵan joq. Ol qos saıys qorytyndysy boıynsha 260 kelini kóterip, atalǵan salmaqta Qazaqstan rekordyn jańartty. «Kúmiske» Shymkent qalasynyń namysyn qorǵap júrgen Arlı Chonteı qol jetkizse, úshinshi orynǵa jetisýlyq Alekseı Drozdov ıe boldy.
61 keli salmaqtyń bas júldesin Almaty oblysynyń sportshysy Tımýr Hasarov qanjyǵasyna baılasa, kúmis medal Syr óńiriniń atleti Azamat Tólegenge, «qola» Almaty oblysynyń taǵy bir ókili Vıktor Nadvornyıǵa buıyrdy.
Aıta keteıik, jarysta Qazaqstannyń 11 oblysy men úsh qalasynan (Almaty, Shymkent, Nur-Sultan) 150-den astam aýyr atlet baq synap jatyr. Olardyń arasynda belgili atletter Zúlfııa Chınshanlo, Aızada Múptılda, Ilıa Ilın, Nıjat Rahımov, Denıs Ýlanov, Arlı Chonteı bastaǵan myqty sportshylar bar.
