Aýyr atletıkadan Qazaqstan kýboginiń ıegerleri anyqtaldy
ASTANA. 6 jeltoqsan. QazAqparat - Qyzylordada aýyr atletıkadan Qazaqstan kýbogy aıaqtaldy. Bes kúnge sozylǵan jarysqa Astana, Almaty qalalarynan jáne oblys ortalyqtarynan 150-de asa qatysqan ziltemirshiler kimniń myqty ekenin anyqtady,
dep habarlaıdy «Alaman» agenttigi.
Jarys QR Sport jáne dene shynyqtyrý isteri agenttigi, Qyzylorda oblysynyń týrızm, dene shynyqtyrý jáne sport basqarmasy, QR aýyr atletıka federatsııasy men oblystyq aýyr atletıka federatsııasynyń uıymdastyrýymen ótkizildi.
Kýboktiń qurmetti qonaqtary aýyr atletıkadan ulttyq quramanyń bas bapkeri Alekseı Nı, aýyr atletıkadan ulttyq quramanyń keńesshi-bapkeri Enver Túrkilerı shaqyryldy. Sonymen qatar, úsh dúrkin Álem chempıony, 2 dúrkin Olımpıada chempıony Ilıa Ilın boldy.
Bul baıraqty básekede oblystyń erler komandasy 186 upaımen top jardy. Almaty oblysynyń komandasy 170 upaımen ekinshi orynnan kórinse, 160 upaımen Qostanaı oblysy úshinshi oryndy enshiledi. Al áıelder arasynda Shyǵys Qazaqstan oblysy (162 upaı) jeńimpaz atansa, qalǵan oryndardy Almaty oblysy (137 upaı) men Qaraǵandy oblysy (122 upaı) ıelendi.
Bul jarystyń bir ereksheligi 94 keli salmaq dárejesinde jeńimpaz atanǵan sportshyǵa oblystyq týrızm, dene shynyqtyrý jáne sport basqarmasy taǵaıyndaǵan 150 myń teńgeniń sertıfıkaty men eki dúrkin Olımpıada chempıony Ilıa Ilın atyndaǵy kýbok sarapqa salyndy. Álemniń úsh dúrkin chempıony, eki dúrkin Olımpıada chempıony, álemdik rekordtardyń ıegeri Ilıa Ilın jeńiske jetken 94 keli salmaq dárejesi aldaǵy ýaqytta jyl saıyn el birinshilikterinde osyndaı júlde tigiledi.
Syr eliniń bastamasymen qolǵa alynǵan bul jarystyń alǵashqy jeńimpazy jerlesimiz, Londondaǵy HHH-shy jazǵy Olımpıada oıyndarynyń qatysýshysy, jastar arasynda Azııa chempıony, Álem chempıonatynyń qola júldegeri Aleksandr Zaıchıkov boldy. Aqshalaı syılyqty Ilıa Ilın atyndaǵy kýbokty ıegerine Ilıanyń ózi tabystady.
Kýbok jeńimpazdary men júldegerleri QR Sport jáne dene shynyqtyrý isteri agenttiginiń medal, dıplomdarymen marapattaldy.
El kýboginiń qorytyndysy boıynsha ulttyq qurama 2013 jyly Astanada ótetin Azııa chempıonatyna daıyndalady.
