Aýyr atletıkadan Qazaqstan chempıonatynda dopıngke qatysty janjal shyqty
ASTANA. QazAqparat - Aýyr atletıka boıynsha Qazaqstan Respýblıkasy chempıonatynyń birinshi kúninde jeńimpaz atanǵan Qyrǵyzstan shtangashysy Jańyl Okoevanyń altyn júldesi qaıtaryp alyndy, dep habarlaıdy Qazaqstannyń Aýyr atletıka federatsııasynyń baspasóz qyzmeti.
«Saıystyń birinshi kúniniń jeńimpazy (48 keli) dopıng synaqtan ótýden bas tartty. Soǵan baılanysty medaldan, dıplom men 250 myń teńgeniń sertıfıkatynan aıyryldy. Altyn, kúmis jáne qola júldeler sáıkesinshe birinshilikte ekinshi, úshinshi jáne tórtinshi oryn alǵan sportshylarǵa berildi», - delingen habarlamada.
Sonymen altyn júlde Galına Momotovaǵa - 145 kg (65+80), kúmis júlde Marına Kokoshkaǵa - 129 kg (56+73), al qola medal Gúldarııa Sátkenge - 75 kg (35+40) buıyrdy. Eske sala keteıik, aýyr atletıkadan Qazaqstannyń ashyq chempıonaty Taldyqorǵanda sáýirdiń 19-y bastaldy, 23-inde aıaqtalady.
