Aýyr atletıkadan Azııa chempıonatynda qazaqstandyqtar úsh medal aldy
TAShKENT. QazAqparat - Aýyr atletıkadan jasóspirimder men jastar arasyndaǵy Azııa chempıonatynda qazaqstandyq sportshylar 24 shilde kúni úsh medal jeńip aldy, dep habarlaıdy QazAqparat tilshisi.
Jasóspirimder arasynda 102 kelide Nıkıta Abdrahmanov altyn medal jeńip aldy. Ol qossaıystyń nátıjesinde 354 (158-196) kelini baǵyndyrdy.
Sondaı-aq, ol budan buryn 20 jasqa deıingiler arasynda kúmis júldeger atanǵan bolatyn.
Al 17 jasqa deıingi jasóspirimder arasynda Joltaı Sanjar (102 keli), 20 jasqa deıingi jastar arasynda Dınara Qypshaqbaı (81 keli) qola júldege qol sozdy.
Aıta ketsek, budan buryn el quramasynan Edige Emberdi (73 keli), Álisher Baıbýrov (67 keli), Denıs Polýboıarınov (81 keli) altyn medal aldy.
Sondaı-aq Nadejda Lı (64 keli), Arýjan Dáýletova (71 keli), Alekseı Chýrkın (73 keli) kúmis medalǵa qol jetkizdi.
Al Erasyl Omarov (55 keli), Azamat Tólegen (61 keli), Egor Sherer (81 keli) qola júldeger atandy.
Qurlyqtyq dodaǵa uldardan - 13, qyzdardan 9 aýyr atlet bardy. Azııa chempıonaty 25 shildede máresine jetedi.
