Aýyr atletıkadan Azııa chempıonatynda Egor Sherer «qola» jeńip aldy
TAShKENT. QazAqparat - Qazaqstandyq Egor Sherer aýyr atletıkadan jasóspirimder men jastar arasyndaǵy Azııa chempıonatynda qola medal aldy, dep habarlaıdy QazAqparat tilshisi.
E.Sherer Ózbekstan astanasy Tashkent qalasynda ótip jatqan qurlyqtyq dodada 20 jasqa deıingi jastar arasynda 81 keli salmaqta synǵa tústi. Qossaıystyń qorytyndysymen 325 (150+175) kelini baǵyndyrǵan aýyr atlet úzdik úshtikti túıindedi.
Aıta ketsek, budan buryn el quramasynan Edige Emberdi (73 keli), Álisher Baıbýrov (67 keli), Denıs Polýboıarınov (81 keli) altyn medal aldy.
Sondaı-aq Nadejda Lı (64 keli), Arýjan Dáýletova (71 keli), Alekseı Chýrkın (73 keli) kúmis medalǵa qol jetkizdi.
Al Erasyl Omarov (55 keli) pen Azamat Tólegen (61 keli) qola júldeger atandy.
Qurlyqtyq dodaǵa uldardan 13, qyzdardan 9 aýyr atlet bardy. Azııa chempıonaty 25 shildede máresine jetedi.
