Aýyr atletıkadan Azııa chempıonaty: Zúlfııa Chınshanlo júldesiz qaldy
NUR-SULTAN. QazAqparat - Qytaıdyń Nınbo qalasynda aýyr atletıkadan ótip jatqan Azııa chempıonatynda qazaqstandyq Zúlfııa Chınshanlo júldeli orynǵa qol jetkize almady, dep habarlaıdy QazAqparat tilshisi.
Ol julqa kóterýde 84 kelini baǵyndyrsa, serpe kóterýde 110 keli salmaqty eńserip, qossaıys qorytyndysy boıynsha 194 upaımen tórtinshi orynda turaqtady.
Esterińizge sala keteıik, osyǵan deıin «Saryqurlyq» dodasynda Arlı Chonteı qola júldege qol jetkizgenin jazǵan bolatynbyz.
Aýyr atletıkadan Azııa chempıonaty 18-28 sáýir aralyǵynda ótedi. Qurlyqtyq doda 2020 jylǵy Tokıo Olımpıadasyna joldama beretin lıtsenzııalyq týrnır sanalady.
Atalmysh jarysta elimizdiń atynan 18 aýyr atlet synǵa túsip jatyr. Olardyń qatarynda erlerden Arlı Chonteıden ózge Farhad Harkı (67 keli), Nurlybek Samenov (81 keli), Denıs Ýlanov (81 keli), Nıjat Rahımov (89 keli), Rústem Sybaı (96 keli), Ilıa Ilın (96 keli), Aleksandr Zaıchıkov (109 keli), Ibragım Bersanov (109 keli), Selımhan Abýbakarov (109 keliden joǵary) bar. Al qyzdarda Zýlfııa Chınshanlo (55 keli), Karına Gorıcheva (64 keli), Ekaterına Stolıarenko (71 keli), Jazıra Japparqul (71 keli), Ekaterına Bykova (76 keli), Raýshan Meshithanova (81 keli), Larısa Kobeleva (81 keli), Aızada Mýptılda (87 keliden joǵary) jarys jolyna shyǵady.
Búgin 81 kelidegi Denıs Ýlanov pen Nurlybek Sámenov jarys alańyna shyǵady.
