Aýyr atletıkadan Azııa chemıonatynyń alǵashqy básekesi jeksenbi kúni bastalady
ASTANA. QazAqparat - Bıyl aýyr atletıkadan Azııa chempıonaty Tashkent qalasynda ótkeli tur. Bul da sportsúıer qaýymnyń nazaryn ózine aýdaratyn is-shara bolmaq. Óıtkeni álem boıynsha nebir myqty aýyr atletter Azııada turady.
«Qazsport» telearnasy Azııa chempıonatyn tikeleı efırde kórsetýdi josparlap otyr. 24 sáýir, jeksenbi kúni Astana ýaqytymen 17-00-de 48 kelige deıingi salmaqtaǵy qyzdar básekesi bastalady. Saǵat 20-00-de 56 kelige deıingi salmaqta erler kúsh synasady.
Birqatar salmaqtar boıynsha Qazaqstan sportshylary da óz áleýetterin kórsetedi. Aldyn ala berilgen málimetter boıynsha, bul dodaǵa bizdiń eldiń bes sportshysy qatysady. Óıtkeni bul chemıonat Olımpıadaǵa joldama beretin lıtsenzııalyq jarys bolyp tabylady.
Eki Álem chempıonatynyń qorytyndysy boıynsha Qazaqstannyń aýyr atletteri Rıo-de-Janeıro qalasynda ótetin HHHІ Olımpıada oıyndaryna tolyq quramda qatysý úshin qajetti lıtsenzııaǵa ıe bolǵan edi. Atap aıtqanda, Rıoǵa 6 er jáne 4 áıel adamǵa joldama alyndy. Al naqty kimder qatysatyny jahandyq báseke eki aı qalǵanda belgili bolmaq.
Aýyr atletıka boıynsha Qazaqstan ulttyq quramasynyń bas bapkeri Alekseı Nı baspasózge bergen suhbatynda maýsymnyń 3-i men 7-si aralyǵynda Taldyqorǵan qalasynda Qazaqstan birinshiligi ótken soń, Olımpıada oıyndaryna baratyn úmitkerlerdiń naqty quramy belgili bolatynyn málimdeı kelip: «Bizge Olımpıada aldynda jaqsy daıyndyǵy bar jáne Rıoda eń joǵarǵy oryn úshin kúrese alatyn myqty sportshylar kerek», - degen edi.
