Aýyr atletıkadan álem chempıonaty: Qazaqstan quramasy medaldar kestesinde qaı orynda tur

ASTANA. QazAqparat - Kolýmbııa astanasy Bogota qalasynda ótip jatqan aýyr atletıkadan álem chempıonatynda Alekseı Chýrkınniń «qola» júldesinen medaldar kestesinde Qazaqstan quramasy toǵyzynshy orynǵa kóterildi, dep habarlaıdy QazAqparat tilshisi.

Aıta ketsek, el quramasynan Alekseı Chýrkın 73 keli salmaqta úshinshi oryn aldy. Ol qossaıystyń nátıjesinde 323 kelini baǵyndyrdy (153 keli - julqa kóterý, jáne 190 keli - serpe kóterý).

Bul el quramasynyń medaldar kestesinde toǵyzynshy orynǵa kóterilýine múmkindik berdi.

Medaldar kestesinde 5 medalmen (2 altyn, 1 kúmis, 2 qola) Qytaı quramasy kósh bastap tursa, odan keıingi oryndarda 4 medalmen Kolýmbııa men Taıland (2-1-1) keledi. Al tórtinshi-besinshi oryndardaǵy Indonezııanyń 3 (1-2-0) Fılıppınniń 1 (1-0-0) medali bolsa, bir-birden kúmis alǵan Taıvan, Úndistan, Vetnamny 6-8 oryndardy ózara bólisip tur.

Bir qola medaldy qanaǵat tutqan Kanada, Meksıka, Ońtústik Koreıa Qazaqstanmen birge 9-12 oryndarda keledi.

Eske salsaq, elimizdiń atynan álem chempıonatyna 13 sportshy attandy.

Ázirge olardyń arasynan Arlı Chonteı (55 keli) tórtinshi oryndy mise tutsa, Anatolıı Savelev (67 keli) segizinshi oryn aldy.

Endi el quramasynan 12 jeltoqsanda Asyljan Bektaı men Denıs Ýlanov (89 keli) baq synaıdy.

Foto: sports.kz