Aýyr atletıkadan ÁCh-da qazaqstandyq jasóspirimderdiń jarys kestesi belgili boldy
NUR-SULTAN. QazAqparat - Grekııada jasóspirimder arasynda aýyr atletıkadan álem chempıonatynda qazaqstandyq sportshylardyń qatysýymen ótetin jarys kestesi belgili boldy, dep habarlaıdy QazAqparat tilshisi.
Álem chempıonaty 2-10 mamyr aralyǵynda Grekııanyń Iraklıon qalasynda ótedi. Onda el quramasynan segiz sportshy baq synaıdy.
El quramasynan jarys jolyna alǵashqy bolyp Ekaterına Alıakına (55 keli) 3 mamyr kúni shyǵady. Ol A tobynda synǵa túsedi.
Odan keıin 5 mamyrda 73 keli salmaqta F tobynda el quramasynan Petr Hrebtov men Alekseı Chýrkın júldelerdi sarapqa salady.
Al 6 mamyrda 81 kelide A tobynda Denıs Polýboıarınov pen Egor Sherer jarys jolyna shyǵady.
A tobynda 7 mamyrda Klım Basargın (89 keli), 8 mamyrda Sultan Meıram (96 keli) saıysqa túsedi.
El quramasynan álem chempıonatyn Aısamal Sansyzbaeva (87 keliden joǵary) 10 mamyrda A tobynda túıindeıdi.
Jasóspirimder arasyndaǵy álem chempıonaty 1975 jyldan beri turaqty túrde ótkizilip keledi.
Qazaqstan quramasy 2021 jylǵy álem chempıonatynda 3 altyn, 2 kúmis, 1 qola medal enshilep, jalpy komandalyq esepte kósh bastaǵan edi.
