Aýyr atletıkadan ÁCh: Aleksandr Zaıchıkov ekinshi altyndy el qorjynyna saldy
ASTANA. QazAqparat - Qazaqstandyq ziltemirshi Aleksandr Zaıchıkov Amerıkanyń Hıýston qalasynda ótip jatqan aýyr atletıkadan álem chempıonatynda 105 kelige deıingi salmaqta altyn medaldy oljalady.
Julqa kóterýde 191, serpe kóterýde 230 kelini eńsergen jerlesimiz jalpy esepte 421 kelini baǵyndyryp, qarsylastarynan ozyq nátıje kórsetti. Ekinshi oryndy reseılik sportshy Davıd Bedjanıan aldy, onyń jalpy kórsetkishi - 411 keli. Al úzdik úshtikti latvııalyq Artýrs Plesnıeks túıindedi. Ol julqa jáne serpe kóterýde 405 kelini baǵyndyrdy. Buǵan deıin 77 kelige deıingi salmaqta Nıjat Rahımov kók baıraǵymyzdy bıikten jelbiretip, altynnan alqa taqqan edi. Sondaı-aq, erler arasynda 94 kelige deıingi salmaqta Almas Óteshev pen áıelder arasynda 69 kelige deıingi salmaqta Jazıra Japparqul kúmis medaldy enshilese, 94 kelige deıingi salmaqta Jasulan Qydyrbaev qola medal alǵan. Jalpy, bul álem birinshiliginde qazaqstandyq sportshylar 2 altyn, 2 kúmis, 1 qolany qanjyǵalady.
Qazaqstandyq jankúıerler osy bir jeńisti sátti «Qazaqstan» ulttyq arnasynan tikeleı efırde tamashalady.
Aıta keteıik, byltyr Almatyda ótken álem birinshiliginde dál osy salmaqta Ilıa Ilın jeńiske jetken bolatyn.
