Aýyr atletıka: Rýfına Chalkarova - álem chempıony
NUR-SULTAN. QazAqparat - Qazaqstandyq aýyr atlet Rýfına Chalkarova Saýd Arabııasynda ótken jasóspirimder arasyndaǵy álem chempıonatynyń jeńimpazy atandy, dep habarlaıdy QazAqparat Olympic.kz-ke silteme jasap.
Jasóspirim qyzdar arasynda 81 keliden joǵary salmaqta synǵa túsken otandasymyz Rýfına Chalkarova jarysta top jardy. Ol qossaıys nátıjesi boıynsha 247 (107+140) kelini baǵyndyrdy.
Brazılııalyq Jýstıne De Lıma Taıane ekinshi orynnan kórinse, túrkııalyq Jevık Fatmagúl úzdik úshtikti túıindedi.
Aıta keterligi, budan buryn jasóspirim uldar arasynda baq synaǵan qazaqstandyq Rahat Bekbolat qossaıys nátıjesinde 355 kelini eńserip, álem chempıony atanǵan bolatyn.
Jasóspirimder arasyndaǵy álem chempıonatyna Qazaqstan sapynan barlyǵy eki sportshy qatysty. Nátıjesinde eki sportshy da altyn medalǵa ıe boldy.
