Aýyr atletıka: Raýshan Meshithanova Qatarda úzdik tórttikke ilikti
NUR-SULTAN. QazAqparat – Dohada aýyr atletıkadan ótip jatqan Qatar kýbogynda qazaqstandyq Raýshan Meshithanova úzdik tórttikke ilikti, dep habarlaıdy QazAqparat tilshisi.
Ulttyq olımpıada komıteti málim etkenindeı, lıtsenzııalyq týrnırde Raýshan 87 kelige deıingi salmaqta óner kórsetti.
Qossaıys qorytyndysynda 216 kg (99+117) nátıjemen R.Meshithanova tórtinshi orynǵa ıe boldy. Ol julqa kóterýden qurama qorjynyna qola júldeni saldy.
Taǵy bir qazaqstandyq Ekaterına Bykova 76 kelige deıingi salmaqta 210 kg (93+117) nátıjemen jetinshi oryndy qanaǵat tutty.
Buǵan deıin erler arasynda Olımpıada chempıony Nıjat Rahımov pen Denıs Ýlanov 81 kelige deıingi salmaqta jarys jolyna shyqqan edi. N.Rahımov qossaıys qorytyndysynda 342 kg (150+192) kóterip, jetinshi orynǵa taban tiredi. Al D.Ýlanov 315 kelimen (140+175) onynshy orynǵa turaqtady.
Eske sala keteıik, budan buryn Igor Son Katarda jeńimpaz atanǵan bolatyn.
Aldaǵy jylǵy Tokıo Olımpıadasyna Qazaqstannan eki-aq atlet (bireýi – er, bireýi – áıel) qatysa alady.
