Aýyr atletıka Olımpıada oıyndarynyń baǵdarlamasynan shyǵarylýy múmkin
NUR-SULTAN. QazAqparat - Halyqaralyq aýyr atletıka federatsııasynyń (IWF) qyzmetine qatysty jalǵasyp jatqan tergeýde jemqorlyq faktileri anyqtalsa, aýyr atletıka Olımpıada oıyndarynyń baǵdarlamasynan shyǵarylýy múmkin, dep habarlaıdy Olympic.kz.
Halyqaralyq aýyr atletıka federatsııasynyń sońǵy eki saılaý kongresinde saılaýshylarǵa para berý órshigeni anyqtalǵan, sonymen qatar 10 mln dollar alynyp, oń nátıje bergen 40 dopıng synamasy jasyrylǵan. Bul aýyr atletıka boıynsha sybaılas jemqorlyqqa qatysty tergeýdiń táýelsiz tujyrymdary, tergeýdi basqarǵan kanadalyq zańger Rıchard Maklaren jarııalaǵan.
Bul týraly kanadalyq zańger Rıchard Maklaren aýyr atletıka boıynsha sybaılas jemqorlyqqa qatysty táýelsiz tergeý nátıjesinde belgili boldy. Tergeý barysynda Maklaren Tamash Aıandy «IWF-tiń» avtorıtarlyq kóshbasshysy» dep atady.
Sebebi, ol halyqaralyq aýyr atletıka federatsııasynda 44 jyldan beri qyzmet atqaryp keledi. Bas hatshy bolsa, qazirde halyqaralyq federatsııa prezıdenti qyzmetinde. Alaıda, Tamash Aıan kez kelgen zań buzýshylyqty joqqa shyǵaryp otyr. «Biz osy baıandamadan, atap aıtqanda, dopıngke qarsy jáne basqarýǵa qatysty osy esepte kórsetilgen is-sharalardan qatty alańdaýshylyq bildiremiz. IWF qadaǵalaý komıssııasynyń qorytyndylaryna baılanysty biz qatań sharalar qabyldaý quqyǵyn ózimizde qaldyramyz. Tek munymen ǵana shektelmeı, aýyr atletıkany Olımpıada baǵdarlamasynan shyǵarý týraly máseleni kóteremiz», - dedi HOK prezıdenti Tomas Bah. 81 jasar Tamash Aıan HOK-tyń burynǵy múshesi, IWF-ta 70 jyldardan bastap jumys istep kele jatyr. Áıeli bas hatshy qyzmetinde bolsa, 2000 jyldan beri bıyl qyzmetinen ketkenshe prezıdent boldy. 121 betten turatyn baıandamada IWF-tegi sybaılas jemqorlyqtyń keń aýqymy egjeı-tegjeıli sıpattalǵan. Qujattaǵy málimet boıynsha, qolma-qol aqsha Tamash Aıannyń negizgi «tabys kózi» bolǵan.
Dopıng aıyppuldary men iri jarys aldynda nemese IWF kongresinde IWF esepshotynan qomaqty qarjy sheship alynyp, Aıanǵa tólenip otyrǵan. «Biz qazir IWF-tiń jańa basshylyǵyna federatsııany reformalaýdy, sondaı-aq dopıngke qarsy júıeni federatsııadan táýelsiz etý áreketin tolyǵymen qoldaıtynymyzdy aıtamyz. Oǵan degen negizgi qadamdar jasaldy». Bah osy tergeý isine qatysty IWF-tiń eshqandaı múshesine HOK tarapynan kelesi jyly Tokıoda ótetin Olımpıada oıyndaryna akkredıtatsııa berilmeıtinin aıtty.
«Mundaı sheneýnikter HOK-tyń Tokıodaǵy daıyndyq kezdesýlerinde bir ústel ústinde otyrmaıdy», - dedi Bah.
