Aýyr atletıka quramasynyń bas bapkeri Baqyt Ahmetov qyzmetinen bosatyldy
ALMATY. QazAqparat - Aýyr atletıkadan Qazaqstan ulttyq quramasynyń bas bapkeri Baqyt Ahmetov qyzmetinen bosatyldy, dep habarlaıdy QazAqparat tilshisi.
QR Aýyr atletıka federatsııasynyń málimetinshe, bul sheshim Almaty qalasynda QR Mádenıet jáne sport mınıstri Aqtoty Raıymqulova men Qazaqstannyń Aýyr atletıka federatsııasy basshylyǵynyń ulttyq quramanyń jattyqtyrýshylar shtabyna qatysty atletter men jattyqtyrýshylardan túsken shaǵymdardy qaraý qorytyndysy boıynsha qabyldandy.
«Federatsııa QR Ulttyq Olımpıada komıtetimen birlesip aldaǵy aýyr atletıkadan Qazaqstan Respýblıkasynyń chempıonaty kezinde ulttyq qurama komandasynyń jattyqtyrýshylar shtabyna úmitkerlerdi irikteýdi osy maqsattar úshin ázirlengen krıterııler negizinde júrgizýge nıetti», – delingen resmı habarlamada.
Buǵan deıin aýyr atlet Albert Lınderdiń óliminen keıin Qazaqstan erler quramasynyń aǵa bapkeri Sergeı Sedov qyzmetinen shettetilgeni týraly jazǵan bolatynbyz.
Qazaqstandyq ziltemirshi Albert Lınder 26 jasqa qaraǵan shaǵynda qaıtys boldy.
