Aýyr atletıka: Qazaqstan quramasy Túrkııada ótetin álem chempıonatyna qatysady
ASTANA. Qyrkúıektiń 16-i. QazAqparat /Ernur Aqanbaı/ - Qyrkúıektiń 18-i men 30-y aralyǵynda Túrkııanyń Antalııa qalasynda aýyr atletıkadan lıtsenzııalyq álem chempıonaty ótedi.
Oǵan Qazaqstan quramasy da qatysady. «Bizdiń sport» saıtynyń málimetinshe, bul álem birinshiliginde bizdiń elimizdiń namysyn áıelderden - Margarıta Elıseeva (48 kg), Svetlana Cheremshanova (53 kg), 2009 jylǵy álem chempıony - Maııa Maneza (63 kg), Anna Nurmuhanbetova (69 kg), 2009 jylǵy álem chempıony - Svetlana Podobedova men Tatıana Hromova (ekeýi de 75 kg) jáne Aleksandra Aborneva (+75 kg), al erlerden - Qýanysh Rahatov pen Rústem Sybaı (ekeýi de 77 kg), Vladımır Kýznetsov pen Erbol Meıirmanov (ekeýi de 85 kg), álem chempıony - Vladımır Sedov pen Almas Úteshov (ekeýi de 94 kg), Sergeı Istomın men Sergeı Vashanov (ekeýi de 105 kg) qorǵaıdy.
Bul chempıonatqa Beıjiń olımpıadasynyń chempıony Ilıa Ilın men 2009 jylǵy álem chempıony Zúlfııa Chınshanlo jáne Beıjiń olımpıadasynyń qola júldegeri Marııa Grabovetskaıa qatyspaıdy. Olar Qytaıda ótetin Azııa oıyndaryna qatysý úshin qazirgi ýaqytta qazirgi ýaqytta Tekelide daıyndyqtaryn pysyqtaýda. Al, Azıadaǵa baratyn qalǵan sportshylar Antalııada ótetin álem chempıonatynyń qorytyndysy boıynsha anyqtalatyn bolady. «Antalııadaǵy álem chempıonaty lıtsenzııalyq bolǵandyqtan, ár el onyń qorytyndysy jáne Frantsııada ótetin kelesi birinshiliktiń nátıjesi boıynsha upaılar jınaýy tıis. Ol upaılar árbir elge 2012 jyly Londonda ótetin Olımpıadada óner kórsetetin sportshylardy tańdaýǵa múmkindik beredi. Bul degenimiz - bizdiń komanda Antalııada kem degende bir altyn medaldi jeńip alýy tıistigin bildiredi», deıdi Aýyr atletıkadan Qazaqstan quramasynyń bas jattyqtyrýshysy Alekseı Nı.
