Aýyr atletıka federatsııasy Vladımır Sedovtyń otbasyna 5 mln teńge bóledi

ASTANA. QazAqparat – Qazaqstan aýyr atletıka federatsııasy Vladımır Sedovtyń ómirden ótýine baılanysty kóńil aıtyp, otbasyna qarjylaı kómek kórsetiletinin jetkizdi, dep habarlaıdy QazAqparat tilshisi.

Qazaqstan aýyr atletıka federatsııasynan málim etkenindeı, elimizdiń eńbek sińirgen sport sheberi, halyqaralyq dárejedegi sport sheberi, Qazaqstannyń áldeneshe dúrkin chempıony jáne rekordshysy Vladımır Sedov bala jasynan sportqa adal boldy.

2008 jylǵy olımpıadada 84 kelige deıingi salmaqta Vladımır Sedov tórtinshi orynǵa ıe boldy.

Tamasha tabystary úshin «Qurmet» ordenimen marapattaldy.

Vladımır 35 jasta edi.

«QR aýyr atletıka federatsııasynyń ujymy Vladımırdiń otbasy men týǵan-týystaryna qaıǵyra kóńil aıtady. Joldasymyzdyń qazasyna baılanysty qaıǵyǵa ortaqpyz. Qazaqstan aýyr atletıka federatsııasy Vladımır Sedovtyń otbasyna 5 mln teńge kóleminde kómek beredi, sondaı-aq ulyn tárbıeleýge qajetti qoldaý kórsetedi.

Sońǵy jyldardaǵy qaıǵyly oqıǵalar sportshylardyń úlken sportpen qosh aıtysqannan keıin qıyndyqtarǵa tap bolatynyn kórsetedi. Federatsııa sport ardagerlerin qoldaý baǵdarlamasyn jasap, jurtshylyqqa usynatyn bolady. Sonyń aıasynda kómekke muqtaj aýyr atletterge qoldaý kórsetiledi. Atletter men bapkerlerdi qoldaý úshin federatsııa bıyl tartylǵan demeýshilik qarjy esebinen 10 mln teńge bóletin bolady», - delingen málimdemede.

Eske sala keteıik, aýyr atletıkadan tórt dúrkin el chempıony Vladımır Sedov 27 maýsym kúni ómirden ótti.

«35 jastaǵy aýyr atlettiń denesi ózi turatyn mekenjaıy - Qaratal aýdanyndaǵy Dostyq aýylynan tabyldy. Denesinen zorlyq-zombylyq belgileri anyqtalǵan joq. Marqumnyń týystary bergen túsiniktemege sáıkes, ol óz-ózine qol salǵan. Qazir sýıtsıd faktisine oraı qylmystyq is qozǵaldy», - delingen edi Jetisý oblystyq polıtsııa departamenti baspasóz qyzmetiniń habarlamasynda.

V.Sedovtyń ólimine qatysty aýyr atlet Ilıa Ilın áleýmettik jelidegi jeke paraqshasynda pikir bildirgen bolatyn.