Aýyr atletıka: Eki qazaqstandyq sportshy Azııa chempıony atandy
ASTANA. QazAqparat - Taılandta Aýyr atletıkadan 17 jáne 20 jasqa deıingi jasóspirimder men jastar arasynda Azııa chempıonaty ótýde.
69 kelige deıingi salmaqta 18 jasar qazaqstandyq ziltemirshi Albert Lınder jalpy kólemi 298 keli (132+166) salmaqty baǵyndyryp, jastar arasynda úzdik atandy. Taǵy bir otandasymyz 62 keli salmaq dárejesinde óner kórsetip júrgen Ádilbek Balhaev 269 keli (122+147) kóterip, tórtinshi orynǵa ıe boldy.
17 jasqa deıingi jasóspirimder arasynda da Qazaqstan quramasynyń balǵyn sportshylary ózderin jaqsy qyrynan kórsetti. Selimhan Ábýbákirov 350 keli (160+190) kórsetkishimen 94 keliden joǵary salmaq sportshylary arasynda chempıon ataǵyn jeńip aldy. 69 keli salmaqta kúsh synasqan Mıhaıl Makeev bolsa, ırandyq Kıanýsh Bagerıkordasýıabıdan sál ǵana qalys qalyp, 2-orynǵa taban tiredi. Qazaqstandyq 271 kelini (122+149) baǵyndyrsa, ırandyq sportshy 274 kelini (121+153) basynan asyra kóterdi. Tımýr Hasarov (56 keli) bul chempıonatta jetinshi (98+120=218 keli) oryndy qanaǵat tutty.
