Aýyr atletıka boıynsha álem chempıonatyna baratyn Qazaqstan quramasynyń quramy anyqtaldy
ASTANA. 11 qazan. QazAqparat - Aýyr atletıka boıynsha Qazaqstan quramasynyń bas jattyqtyrýshysy Alekseı Nı Vrotslavta ótetin álem chempıonatyna baratyn sportshylardy iriktep aldy, dep habarlaıdy vesti.kz.
Búgingi ótken baqylaý jattyǵýynan keıin quramanyń jattyqtyrýshylar shtaby álem chempıonatyna kelesi sportshylardy alýdy uıǵardy: Tımýr Hasarov, Arlı Chonteı (56 kelige deıin), Albert Lınder (62 kelige deıin), Vladımır Sedov, Almas Óteshev (94 kelige deıin), Eskendir Momynbekov, Sergeı Istomın, Zelımhan Abýbakarov (105 kelige deıin jáne 105 keliden joǵary).
Áıelder komandasynyń quramynda álem chempıonatyna baratyndar: Galına Mamotova (48 kelige deıin), Margarıta Elıseeva (53 kelige deıin), Sáýle Sádýaqasova (58 kelige deıin), Karına Gorıcheva (63 kelige deıin), Jázıra Japparqul (69 kelige deıin), Anastasııa Halıkova (75 kelige deıin) jáne Marııa Grabovetskaıa (75 keliden joǵary).
Keıbir sportshylarǵa demalys berilip, bul jarysqa qatyspaıtyn bolyp sheshildi. Olar jazǵy Ýnıversıadanyń kúmis júldegeri Aleksandr Zaıchıkov, Azııa oıyndarynyń júldegeri Kırıll Pavlov, Qazanda ótken Ýnıversıadanyń chempıony Farhat Harkı jáne London Olımpıadasyna qatysýshy Anna Nurmuhambetova.
Aýyr atletıka boıynsha álem chempıonaty Polshanyń Vrotslav qalasynda qazan aıynyń 20-y men 26-y aralyǵynda ótetindigin esterińizge salamyz.
