Aýyr atletıka: Azııa chempıonatyna baratyn Qazaqstan quramasy anyqtaldy
ORAL. QazAqparat – Tashkent qalasynda 17-25 sáýir aralyǵynda ótetin aýyr atletıkadan Azııa chempıonatyna baratyn Qazaqstan quramasy anyqtaldy, dep habarlaıdy QazAqparat tilshisi.
Qazaqstan aýyr atletıka federatsııasy málim etkenindeı, lıtsenzııaly bul týrnır aldaǵy Olımpıada oıyndaryna ranjırleý aıasynda qajetti reıtıngtik upaıdy jınaýǵa múmkindik beredi.
Azııa birinshiliginde el namysyn 17 sportshy qorǵaıdy:
Abylaı Áýelhanov (55 kg)
Arlı Chonteı (55 kg)
Igor Son (61 kg)
Alekseı Drozdov (61 kg)
Saıramkez Aqmolda (67 kg)
Aleksandr Ývarov (81 kg)
Nurǵısa Ádiletuly (89 kg)
Artem Antropov (102 kg)
Rahat Bekbolat (102 kg)
Ibragım Bersanov (109 kg)
Zýlfııa Chınshanlo (55 kg)
Gúlnur Ybyraı (64 kg)
Ekaterına Bykova (71 kg)
Aısha Omarova (71 kg)
Karına Kýzganbaeva (81 kg)
Raýshan Meshithanova (87 kg)
Aızada Múptilda (87+ kg).
Qazaqstan ulttyq quramasynyń bas bapkeri Baqyt Ahmetovtiń aıtýynsha, Azııa dodasyna daıyndyq josparǵa sáıkes júrgizilýde.
«Qurama Tashkentke ushardyń aldynda Almaty oblysynda oqý-jattyǵý jıynynda sheberlikterin shyńdaıdy. Sportshylar tizimine el birinshiliginde úzdik shyqqandar endi. Kóbiniń halyqaralyq jarystarda alǵan tájirıbesi bar. Sonymen qatar qaraǵandylyq Aısha Omarova, Almaty oblysynan Alekseı Drozdov jáne shymkenttik Aleksandr Ývarov mundaı dodada alǵash ret baq synamaqshy. Basty maqsat – bıylǵy Olımpıadaǵa joldama alý», dedi B.Ahmetov.
Tokıoǵa barýdan negizgi úmitkerler – áıelder arasynan Zýlfııa Chınshanlo men Raýshan Meshithanova, erlerden Ibragım Bersanov pen Igor Son. Naqty kimniń baratyny maýsym aıynda biliktilik kezeńi aıaqtalǵannan keıin belgili bolady.
