Aýyr atletıka: Anastasııa Shvaber - Álem chempıony
ALMATY. 10 mamyr. QazAqparat - Keshe Perýdiń Lıma qalasynda aýyr atletıkadan jastar arasynda ótip jatqan Álem chempıonatynda 75 kelige deıingi salmaqta Anastasııa Shvaber Álem chempıony atandy.
Ol serpe kóterýde - 98, julqa kóterýde 126 kelini kóterip, qos saıys qorytyndysynda 224 kelini baǵyndyrdy. Odan 10 kelige qalyp qoıǵan amerıkandyq Jennı Lıvettı Artýrdyń (Jenny lyvette Arthur) kórsetkishi serpe kóterýde -2, julqa kóterýde 6 kelige kem boldy. Al 212 kelimen qola júldeger atanǵan kanadalyq Johanı Fılıatreaýlt (Johanie Filiatreault) serpe kóterýde - 93, julqa kóterýde - 119 kelini ǵana baǵyndyrdy.
Jalpy jastar arasyndaǵy Álem chempıonaty bıyl boıjetkender arasynda 19-shy, al bozbalalar arasynda 39-shy ret ótip otyr. 52 eldiń 245 atleti qatysqan bul básekege Qazaqstan tek boıjetkender arasynda 3 sportshy qosqan bolatyn. Karına Gorıchevanyń (63 kg) sátsizdiginen keıin Jazıra Japarqul (69 kg) men Anastasııa Shvaberge (75 kg) artylǵan senim aýyrlaı túsken edi. Olar bapkerler úmitin aqtady. Aldymen Jazıra el qorjynyna kúmis medal salsa, endi Anastasııa ony altynmen tolyqtyryp otyr.
