Aýyr atlet Erasyl Sáýlebekov jasóspirimder arasynda álem chempıony atandy
NUR-SULTAN. QazAqparat – Qazaqstandyq Erasyl Sáýlebekov jasóspirimder arasynda Meksıkanyń Leon qalasynda aýyr atletıkadan ótip jatqan álem chempıonatynda jeńimpaz atandy, dep habarlaıdy QazAqparat tilshisi.
Qazaqstan aýyr atletıka federatsııasynan málim etkendeı, Erasyl 67 kelige deıingi salmaqta úzdik shyqty.
Qazaqstandyq sportshy qossaıys qorytyndysynda 281 kelini (123+158) baǵyndyrdy.
Túrkııalyq Alaaddın Saın 278 kelimen (121+157) ekinshi, polıak Bartosh Býrskı 269 kelimen (116+153) úshinshi orynǵa kóterildi.
Taǵy bir qazaqstandyq Darıa Balabaıýk 49 kelige deıingi salmaqta julqa kóterýden qola medalǵa qol jetkizdi. Degenmen ol qossaıys qorytyndysynda 152 kelimen (69+83) tórtinshi orynǵa taban tiredi.
Eske sala keteıik, budan buryn aýyr atletıkadan álem chempıonatynda Qazaqstan qorjynyna taǵy bir medal túskenin jazǵan bolatynbyz.
