Aýyr atlet Denıs Ýlanov Azııa chempıonatynda qola medal ıelendi
NUR-SULTAN. QazAqparat - Qytaıdyń Nınbo qalasynda ótip jatqan Azııa chempıonatynda qazaqstandyq sportshy Denıs Ýlanov qola medal ıelendi, dep habarlaıdy QazAqparat tilshisi Qazaqstan aýyr atletıka federatsııasynyń baspasóz qyzmetine silteme jasap.
«81 kelige deıingi salmaqta óner kórsetken Denıs Ýlanov qos saıysta 356 keli (160+196) salmaqty baǵyndyrdy. Sonymen birge, onyń qorjynynda serpe jáne julqı kóterýde kishi qola medaldan bar», - delingen habarlamada.
Ókinishke qaraı, aýyr atlet Nurlybek Sámenov serpe kóterýden keıin jaraqat alyp, jarys jolyn aıaqtady.
Esterińizge sala keteıik, osyǵan deıin «Saryqurlyq» dodasynda Arlı Chonteı qola júldege qol jetkizgen bolatyn.
Aýyr atletıkadan Azııa chempıonaty 18-28 sáýir aralyǵynda ótedi. Qurlyqtyq doda 2020 jylǵy Tokıo Olımpıadasyna joldama beretin lıtsenzııalyq týrnır sanalady.
Atalmysh jarysta elimizdiń atynan 18 aýyr atlet synǵa túsip jatyr. Olardyń qatarynda erlerden Arlı Chonteıden ózge Farhad Harkı (67 keli), Nurlybek Samenov (81 keli), Denıs Ýlanov (81 keli), Nıjat Rahımov (89 keli), Rústem Sybaı (96 keli), Ilıa Ilın (96 keli), Aleksandr Zaıchıkov (109 keli), Ibragım Bersanov (109 keli), Selımhan Abýbakarov (109 keliden joǵary) bar. Al qyzdarda Zýlfııa Chınshanlo (55 keli), Karına Gorıcheva (64 keli), Ekaterına Stolıarenko (71 keli), Jazıra Japparqul (71 keli), Ekaterına Bykova (76 keli), Raýshan Meshithanova (81 keli), Larısa Kobeleva (81 keli), Aızada Mýptılda (87 keliden joǵary) jarys jolyna shyǵady.
