Aýyr atlet Artem Antropov Azııa chempıonatynda qola medal aldy
ASTANA. QazAqparat - Qazaqstandyq Artem Antropov aýyr atletıkadan Azııa chempıonatynda qola júldeger atandy, dep habarlaıdy QazAqparat tilshisi.
Qurlyqtyq doda búgingi kúnderi Bahreın astanasy - Manama qalasynda ótkizilýde.
Azııa chempıonatynda 96 keli salmaqta synǵa túsken Artem Antropov qossaıystyń nátıjesinde 377 (158+219) kelini baǵyndyrdy. Nátıjesinde úshinshi orynǵa turaqtady.
Atalǵan salmaqta bahreındik Lesman Paredes qossaıysta 397 (182+215) keli nátıje boıynsha altyn alsa, 383 (177+206) keli salmaqpen Taıbeıden kelgen Chen Po-Djenge kúmis buıyrdy.
Eske salsaq, budan buryn el quramasynan Zýlfııa Chınshanlo men Asyljan Bektaı chempıon atandy.
Al Arlı Chonteı men Araı Nurlybekova kúmis, Aısha Omarova qola júlde aldy.
