Aýylyna kópir salǵan muǵalim «100 jańa esim» jeńimpazy atandy

NUR-SULTAN. QazAqparat – «Qazaqstannyń 100 jańa esimi» jobasynyń jeńimpazy Ahat Raqyshev bul jeńisi týǵan aýylynyń ortaq tabysy ekenin aıtty, dep habarlaıdy QazAqparat tilshisi.

Byltyr áleýmettik jelide Shyǵys Qazaqstan oblysy Úrjar aýdany Kóktal aýylynyń turǵyndary ózennen qaýipsiz ótý úshin óz kúshterimen kópir salyp alǵany týraly aqparat taraǵan bolatyn. Sol istiń uıytqysy bolǵan Raqyshev «Qazaqstannyń 100 jańa esimi» jobasynda jeńimpaz atanyp otyr.

«Negizgi mamandyǵym – muǵalim. Aýylǵa kópir salý kerektigi talaıdan beri aıtylyp júrgen. Sodan synyptastarymyzben mektep bitirgenimizge 20 jyl bolǵanyn erekshe bir ispen este qaldyrsaq dep kelistik. 30 jyl burynǵy túlekter de osy ıdeıaǵa atsalysty. Kópir qurylysyna negizgi qarajatty osy eki top shyǵardy. Halyq ta qolynda barymen bólisti. Al men balalarǵa syzý páninen sabaq beretin bolǵandyqtan, kópirdiń syzbasyn jobalaý maǵan júkteldi» - deıdi ustaz.

Ol alǵashynda bul bastama qarapaıym muqtajdyqtan týyndaǵanyn, osy arqyly tanymal bolsaq degen oı kózdemegenderin aıtady.

«Aýylda bolǵandyqtan, qurylystyń basy-qasynda únemi júrýime týra keldi. Sondyqtan, «100 jańa esimge» ortalarynan meni shyǵarǵan bolar. Áý basta bul is arqyly áleýmettik jelini shýlatyp, tanymal bolaıyq dep oılaǵan joqpyz. Jaı ǵana aýyldyń bir muqtajdyǵyn óteý kerek boldy.

Bul iste ózimizdiń aýyldyń ákimi jaqsy qoldaý bildirdi. Qazir kópir el ıgiligine jumys istep tur. Endi sonyń qujatyn zańdastyryp, qaýipsiz qyzmet kórsetýin pysyqtap jatyrmyz.

Bul jobaǵa atsalysqan árbir aýyldasym «100 jańa esim» jeńimpazy atanýǵa laıyq. Bul baıqaýdaǵy meniń jeńisim – búkil aýylymnyń jeńisi», - deıdi Ahat Raqyshev.