Aýylmen salystyrǵanda qalalyq jerdegi jaǵdaı neǵurlym ornyqty- Statıstıka agenttigi
ASTANA. Jeltoqsannyń 15-i. QazAqparat /Qanat Mámetqazyuly/ - Aýylmen salystyrǵanda qalalyq jerdegi jaǵdaı neǵurlym ornyqty. QR Statıstıka agenttiginiń kedeılik deńgeıine baılanysty júrgizgen zertteýleri osyny kórsetip otyr,
dep habarlaıdy QazAqparat.
«12 myń úı sharýashylyǵyn iriktep zertteý nátıjeleri boıynsha tabysy eń tómengi kúnkóris shamasynan tómen úı sharýashylyqtarynyń úlesi aǵymdaǵy jylǵy 3 toqsanda 10,5 paıyzdy qurady. Bul kórsetkish 2008 jylǵy tıisti deńgeıden 5,7 paıyzdyq tarmaqqa tómen. Esepti jyldyń ishindegi kedeıliktiń toqsandyq kórsetkishterine tán aýytqýlarǵa qaramastan, aǵymdaǵy jylǵy 3-i toqsanda tirkelgen kedeılik deńgeıiniń tómendeý qarqyny 2007-2008 jyldardaǵy tıisti kezeńderde qalyptasqan jaǵdaıdan erekshelenedi. 2007-2008 jyldardaǵy tıisti kezeńderde kedeılik deńgeıiniń ósýi, birinshi kezekte aýyldyq jerlerdegi tutynýǵa paıdalanylǵan tabystar deńgeıiniń tómendeýimen baılanysty bolǵan. 2009 jylǵy qala men aýyl bólinisindegi kedeıliktiń deńgeıin qarastyra otyryp, aýylmen salystyrǵanda qalalyq jerdegi neǵurlym ornyqty jaǵdaıdy atap ótýge bolady», delingen agenttik taratqan baspasóz paraǵynda.
Málimetterge súıensek, eger aýylda 3 toqsandaǵy kedeılik deńgeıi aǵymdaǵy jylǵy ótken kezeńmen salystyrǵanda 9 paıyzdyq tarmaqqa tómendese, qalada - tek 2,2 paıyzdyq tarmaqqa tómendegen.
