Aýylǵa tıesili jer jeke menshikten qalaı shyǵarylady

ASTANA. QazAqparat – Aýyl sharýashylyǵy mınıstri Erbol Qarashókeev vedomstvonyń keńeıtilgen alqa májilisinen keıin BAQ ókilderine aýylǵa tym jaqyn jatqan jeke menshik jer aýyldyń qoryna qalaı beriletinin túsindirdi, dep habarlaıdy QazAqparat tilshisi.

«Aqmola oblysynyń Shortandy, Aqkól aýdandarynda dál aýyldyń irgesinde 500 metr radıýsta egis alqaptary bar. Jańa zańnyń aıasynda mundaı jerler eldi mekenniń ıgiligine qalaı qaıtarylady?» - dep surady BAQ ókili mınıstrden.

«Ótken jyldyń basynan beri zańnamaǵa ózgerister engizilgen. Sonyń negizinde jergilikti ákimdikter aýylǵa jaqyn jer alqaptaryn Úkimettiń rezervine alyp qoıyp, ıelerine qarajat tólep, bosaǵan jerdi eldi mekenniń mal basyna qaraı jaıylym retinde paıdalaný múmkindigi berilip otyr.

Ol múmkindikti paıdalanýdy ákimdikter qazir negizinen bastady. Onyń oń áseri bolady», - dedi Erbol Qarashókeev.

Sondaı-aq, mınıstr qazir eldegi qoımalarda pııazdyń 100 myń tonnadan astam pııaz ǵana qalǵanyn aıtty.

«Biz 1,1 mln tonna pııaz óndirgenbiz. Ózimizdegi tutyný kólemi 300 tonna ǵana. Mysaly, byltyr 800 myń tonna pııaz ózimizge de, eksporttaýǵa da tolyq jetken. Bıyl álem boıynsha óte qıyn jaǵdaı týyndap tur. Negizgi pııaz óndirýshi elder túrli tabıǵı sebepterge baılanysty jyldaǵy kólemdi bere almady. Aıtalyq, Pákistanda qıyndyqtar bar. Al bul el pııazdyń álemdik qoımasy sanalatyn. Bir jerinde sý tasqyny, bir jerinde qýańshylyq boldy. Bul elderde eksport kólemi kúrt qysqardy da, bizdiń pııazdy kórshiles elderge shyǵara bastady. Qazir qarap otyrmyz, ózimizde pııazdyń 100 myń tonnadan astam qory bar. Erte pisetin pııaz kelgenshe, kóktemge deıin osy pııazdy saqtaý kerek. Osyǵan baılanysty vedomstvoaralyq komıssııa pııazdy syrtqa shyǵarýǵa shekteý qoıý týraly sheshim qabyldady», - dedi ol.