Aýylǵa keletin medıtsınalyq mamannyń áleýmettik máselelerin sheshý kerek – Premer-Mınıstr
«Ózderińiz biletindeı, aýyldyq jerdegi densaýlyq saqtaý júıesin odan ári damytý úshin arnaıy ulttyq joba ázirlendi. Aýyldarda medıtsınalyq qyzmettiń sapasyn jaqsartý úshin barlyq ınfraqurylymdy jańǵyrtý qajet. Joba aıasynda 655 alǵashqy medıtsınalyq-sanıtarııalyq kómek obektisi salynyp, qaıta jóndeledi. Sondaı-aq, 12 aýrýhana jańǵyrtylyp, jańadan 20 aýdandyq aýrýhana ashylady. Basqa da jobalar aıasynda, mysaly, «Aýyl – el besigi» jobasy boıynsha medıtsınalyq obektiler salý kózdelip otyr. ıAǵnı, aýyl halqy úshin barlyǵy 700-ge jýyq medıtsınalyq obektiler ashylady», - dedi Á. Smaıylov Úkimettiń búgingi otyrysynda.
Ol úshin jergilikti atqarýshy organdar jer ýchaskelerin bólýdi jedel qamtamasyz etip, ınjenerlik kommýnıkatsııalardy júrgizý máselesin sheshýi qajet.
Budan basqa, joba aıasynda aýyldaǵy medıtsınalyq uıymdardy densaýlyq saqtaýdyń biryńǵaı aqparattyq júıesine ıntegratsııalaý kózdelip otyr. Sondaı-aq, jańa tehnologııalar jappaı engiziledi, bul halyqqa ózderi turatyn óńirlerde sapaly medıtsınalyq qyzmetter alýǵa múmkindik beredi.
«Árıne, ulttyq jobanyń asa mańyzdy aspektileriniń biri – kadr tapshylyǵy problemasyn sheshý jáne aýyldyq jerdegi medıtsına qyzmetkerleriniń biliktilik deńgeıin arttyrý. Sondyqtan, óńir ákimderi aýylǵa keletin medıtsınalyq kadrlardyń áleýmettik máselelerin sheshýge nazar aýdarýy qajet. Jas mamandar aýylǵa kelip, biliktiligin arttyrýǵa jáne jumys istep, sonda turaqtap qalýǵa múddeli bolýy kerek.
Jobada kózdelgen barlyq sharalar aýyldaǵy medıtsınalyq qyzmettiń sapaly ári qoljetimdi bolýyn qamtamasyz etedi. Osyǵan baılanysty Ulttyq jobany maquldaýdy usynamyn. Densaýlyq saqtaý mınıstrligi múddeli memlekettik organdarmen jáne ákimdiktermen birlesip, ulttyq jobadaǵy is-sharalardyń ýaqtyly oryndalýyn qamtamasyz etýi qajet», - dedi Úkimet basshysy.
Buǵan deıin Densaýlyq saqtaý mınıstri A. Ǵınııat aýyl turǵyndarynyń densaýlyq jaǵdaıyn jaqsartýǵa arnalǵan «Aýyldyq densaýlyq saqtaýdy jańǵyrtý» jobasy týraly baıandaǵan edi.