Aýylǵa da úı kerek - baspasózge sholý
"Egemen Qazaqstan" basylymy óziniń búgingi sanynda tanymal ádebıettanýshy Serik Negımovtiń qalamger shyǵarmashylyǵy týraly tolǵanysyn oqyrman nazaryna usynyp otyr.
"Qazaq ádebıeti taǵy da bir abyroıly bıikke kóterildi. Reseı Federatsııasynyń «Lýchshıe knıgı ı ızdatelstvo goda-2013» atty ulttyq syılyǵy Nemat Kelimbetovtiń «Hýdojestvennaıa lıteratýra» baspasynan jaryq kórgen «Nadejda. O samom sokrovennom» («Úmit úzgim kelmeıdi») kitaby úshin berildi", - dep jazady gazet.
«Egemen Qazaqstan» basylymy «Qıǵashtaǵy kópir» degen maqalasynda bul jobanyń Qazaqstan men Reseı ǵana emes, TMD elderi arasyndaǵy alǵashqy birlesken joba ekendigin alǵa tartady. «Ejelden qońsy otyrǵan Qazaqstan men Reseıdiń yntymaqtastyq, iskerlik qarym-qatynasynyń kókjıegi ár salada keńeıip keledi. Onyń mysalyn shekaralas aımaqtardaǵy ózara baılanystardyń jandanǵanynan kórýge bolady» dep jazady basylym. Gazettiń jazýynsha, jańa kópir ústimen birinshi bolyp Reseıge bet alǵan qazaqstandyq kólikter táýlik boıy bir toqtamaıtyn kólik qatynasyna dańǵyl jol salǵany daýsyz. Óıtkeni, Qazaqstan men Reseı arasyndaǵy saýda-ekonomıkalyq, ıntegratsııalyq baılanystardyń artýyn aıtpaǵanda, bul kópir Orta Azııa men Taıaý Shyǵys elderiniń Reseımen, Ýkraınamen, Kavkaz jáne Eýropa elderimen aradaǵy kólik qatynasyn jetildirýge jol ashyp otyr.
Ulttyq bas gazettiń aıqarma qos beti alda bolatyn Qazaqstan halqy Assambleıasynyń kezekti sessııasyna arnalyp, elimizdegi ultaralyq kelisim men azamattyq qoǵam birligine arnalǵan toptama materıaldardy usynǵan.
«Álemdik kóne tarıhqa úńilip, yqylym zamandar qoınaýynan otyz jyldan astam ýaqyttan beri túrik tektes halyqtardyń ortaq tarıhyna, onyń ishinde qazaq halqyna qatysty sýyrtpaqtap syr izdegen tarıhshy-jazýshy Qoıshyǵara Salǵaraulynyń ǵylymı qaýymǵa usynǵan jańa eńbegi «Myńǵyl men mońǵol jáne úsh Shyńǵys» dep atalady. Almatydaǵy «Úsh qııan» baspasynan jaryq kórgen osy týyndy jaıly «Egemen Qazaqstan» gazeti jýrnalıst-zańger Aqaıdar Ysymulynyń oı-tolǵamdaryn oqyrmandar talqysyna salady.
"Aýyldaǵy aǵaıynnyń da turǵyn úı máselesin oılaıtyn jan bar eken" dep jazady "Aıqyn" basylymy "Aýylǵa da úı kerek" atty maqalada.
"Parlament Májilisiniń depýtaty Svetlana Qadyrálıeva «Qoljetimdi baspana - 2020» baǵdarlamasy aýyldarda jumys istemeıdi, baspana qurylysy búginderi, negizinen, qalalar men oblys ortalyqtarynda ǵana júrgizilýde, al aýyl turǵyndaryn baspanamen qamtamasyz etý múldem umyt bolǵan jáne aýyl turǵyndarynyń memlekettik baspanamen qamsyzdandyrý týraly konstıtýtsııalyq quqyǵy iske asyrylmaıdy» dep elimizdiń eks-Úkimet basshysy Serik Ahmetov otstavkaǵa ketpeı turyp saýalyn joldap úlgerdi. Úkimettegi aýys-túıis kezinde eskerýsiz qalmasa, negizi, depýtattyń kóterip otyrǵan máselesi óte oryndy", - delingen materıalda.
Shynynda, aýyldaǵylardy baspanamen qamtamasyz etýdiń arǵy jaǵynda jastardy aýylda turaqtandyrý, aýyl sharýashylyǵy salasynyń jumysyn jandandyrý, árbir degende 30-40-qa kelgenshe ata-anasynyń zeınetaqysymen kún kórip, úılenbeı, enshi almaı júrgen qyz-jigitterimizdiń óz aldyna otaý quryp, el demografııasyna úles qosý sııaqty aýqymdy máseleleri tur.
"Aıqynnyń" taǵy bir maqalasynda Qazaqstannyń bolashaq analarynyń densaýlyǵy syndy ózekti taqyryp qozǵalyp otyr.
Qazirgi tańda bedeýlik tek bir otbasynyń máselesi ǵana emes, búkil qoǵamdyq dertke aınalyp bara jatqany jasyryn emes. Shańyraqta balanyń shat kúlkisi bolmaǵandyqtan, erli-zaıyptylardyń ajyrasýy da kóp oryn alǵan.
"Mamandardyń aıtýynsha, otbasyn qurǵandardyń 15 paıyzynda bedeýlik kezdesse, jyl saıyn urpaq órbitý boıynsha dárigerdiń aldyna 20 myńǵa jýyq jup júginedi eken. Olardyń kem degende 30 paıyzyna reprodýktıvti medıtsınanyń kómegi qajet", - delingen "Jatyr isigi jasaryp barady" atty maqalada.
«EKO» jasatý óte qymbat bolǵandyqtan, memleket 2010 jyldan beri arnaıy kvota bólip keledi. Alǵashynda 100 kvota bólinse, qazir onyń sany 700-ge jetti. Osy ýaqyt aralyǵynda Qazaqstanda jalpy sany 10 myńǵa jýyq bala reprodýktıvti medıtsınanyń kómegimen dúnıege kelipti.
"Túrkistan" gazeti "Úkimet basyna ekinshi ret kelgen birinshi premer-mınıstr" atty maqala jarııalady. Onda Elbasy N. Nazarbaevtyń jańa Premer-Mınıstrge artqan mindetteri týraly aıtylady.
"Bul kandıdatýra qazirgi jaǵdaıda tıimdi jumysty qamtamasyz etý úshin meılinshe laıyqty dep esepteımin", - dep atap ótti Prezıdent. Basty maqsat ınvestorlardy tartý qajettigin de aıtty. Al bul turǵyda Másimov myrzanyń sheteldik uıymdar men kásipkerlerge etene tanys ekeni belgili. "Kárim Másimov biz retsessııaǵa jáne jumyssyzdyqtyń ósýine jol bermegen 2007-2009 jyldardaǵy daǵdarys kezeńinde jumys istedi. Ekonomıkany odan ári damytý úshin bizge eldiń ishinde de, negizgi sheteldik seriktesterimizben de tıimdi jumys júrgizý qajet», - dedi Nursultan Nazarbaev. Parlament Májilisiniń depýtattary eldiń Premer-Mınıstri laýazymyna K.Másimovtiń kandıdatýrasyn biraýyzdan maquldaǵan bolatyn (105 daýys). Kárim Qajymqanuly Másimov 1965 jyly týǵan. Ol 2007 jyldyń qańtar aıynan 2012 jyldyń qyrkúıegine deıin QR Premer-Mınıstri qyzmetin atqarǵan bolatyn", - delingen materıalda.
" Kazahstanskaıa pravda» gazeti «Vektor HHІ veka» degen aqparattyq-taldama materıalynda Qazaqstandaǵy atom ónerkásibiniń damýy jáne keleshegi jaıly Indýstrııa jáne jańa tehnologııalar vıtse-mınıstri Baqytjan Jaqsalıevtiń maqalasyn usynǵan. Gazettiń jazýynsha, búginde álemde jalpy qýaty 372 GVt 435 atom reaktorlary jumys isteıdi eken. Atom elektr stansalaryn salý energııaǵa arta túsip otyrǵan suranysty qanaǵattandyrýmen qatar ekologııalyq jaǵdaıdy jaqsartýǵa múmkindik beredi. Búginde elimiz Qazaqstanda AES qurylysy boıynsha mańyzdy sheshim qabyldaý tabaldyryǵynda tur. Atom energetıkasyn damytý joǵary tehnologııaly jáne perspektıvaly salany damytýǵa jáne bizdiń ýran qorlarymyzdy óz múddemizge jaratýǵa jáne uzaq merzimde eldiń energııalyq qaýipsizdigin qamtamasyz etýge múmkindik bermek.
