Aýylǵa baratyn jas dárigerlerge kótermeleý járdemaqysy artady

NUR-SULTAN. QazAqparat – Aýylǵa baratyn jas dárigerlerge kótermeleý járdemaqysy artady. Bul týraly búgin QR Densaýlyq saqtaý mınıstri Alekseı Tsoı aıtty, dep habarlaıdy QazAqparat tilshisi.

«Medıtsına uıymdaryn bilikti kadrlyq resýrstarmen jınaqtaý úshin biz kelesi is-sharalardy kózdep otyrmyz. Medtsına qyzmetkerleriniń jalaqysyn kezeń-kezeńmen arttyrý arqyly 2023 jylǵa qaraı ekonomıkadaǵy ortasha jalaqydan eki ese asyp túsetin deńgeıge jetizý josparlanǵan», - dedi Alekseı Tsoı Densaýlyq saqtaý mınıstrliginiń keńeıtilgen alqa otyrysynda.

Sonmen qatar ol aýyldyq jerlerge jumys isteýge barǵan jasa mamandarǵa beriletin kótermeleý járdemaqy mólsheri 70 aılyq eseptik kórsetkishten 100 AEK-ke deıin arttyrylatyndyǵyn atap ótti.

«Buǵan qosa, biz 2030 jylǵa deıin medıtsınalyq kadrlarmen qamtylýdy boljaý modelin engizýdi kózdep otyrmyz», - dedi mınıstr.