«Aýyldyń juldyzy janǵan jyl» - respýblıkalyq basylymdarǵa sholý
***
Keshe Astanadaǵy «Qazaqstan» ortalyq kontsert zalynda Qazaqstan Respýblıkasy Táýelsizdiginiń 20 jyldyǵyna arnalǵan elimizdiń agroónerkásip qyzmetkerleriniń respýblıkalyq forýmy bolyp ótti. Onyń jumysyna Memleket basshysy Nursultan Nazarbaev qatysyp, sóz sóıledi. Osy alqaly jıyn arqaý bolǵan maqala «Egemen Qazaqstan» gazetinde «Aýyldyń juldyzy janǵan jyl» degen taqyryppen berildi. Forýmdy qorytyndylaǵan Elbasy: «Keńes odaǵynan bizge aýyrtpalyǵy mol, artta qalǵan aýyl sharýashylyǵy mura bolyp qaldy. Azattyqtyń alǵashqy jyldarynda da aýyl alapat daǵdarystardy bastan ótkerdi. Maldyń basy azaıdy, jerdi ıgerý toqtap qaldy. Degenmen, sol qıyndyqtardy jeńip, aýqymdy jańǵyrtýlar arqyly biz aýyl sharýashylyǵyn qaryshtatyp, damyta aldyq. Biz jasampaz jıyrma jylda aýyldyń eńsesin tiktep, agroónerkásipti órge súıredik», - dep atap ótken.
«Keshe Almatyda «Qazaqstan» atty monýmentti-músindik kompozıtsııa ashyldy», - dep jazady «Egemen Qazaqstan» gazeti «Eldiń eren eskertkishi» degen taqyryptaǵy maqalasynda. Basylymnyń atap ótýinshe, Qazaqstan Respýblıkasynyń Tuńǵysh Prezıdenti atyndaǵy saıabaqta «eki qanatyn» kergen eskertkish qola men granıtten jáne mármár tastan jasalǵan. Kompozıtsııa ortasynda Qazaqstan Respýblıkasynyń Tuńǵysh Prezıdentiniń eńseli músini bar. Qos qanatta Astana men Almaty beınelengen.
***
Prezıdent «Qazaqstannyń keıbir zańnamalyq aktilerine quqyq qorǵaý qyzmetin jetildirý jáne qylmystyq zańnamany odan ári izgilendirý máseleleri boıynsha ózgerister men tolyqtyrýlar engizý týraly» zańǵa qol qoıdy. Endi qoǵamdy izgilendirýge qatysty qandaı ózgerister bolýy múmkin? Mine osy máseler týrasynda «Aıqyn» gazetine Parlament Májilisiniń depýtaty, «Nur Otan» partııasy Quqyqtyq keńes múshesi Serik Temirbolatov óz pikirin bildirgen. «Osy zań arqyly tárbıeleý kolonııalaryndaǵy jastary kámeletke tolmaǵan sottalǵandardyń da jaǵdaıy jeńildetilip otyr. Olar azyq-túlik, eń alǵashqy qajetti zattardy alý úshin burynǵy bes aılyq eseptik kórsetkishtiń ornyna jeti aılyq kórsetkish kóleminde esepshottaryndaǵy qarjydan jumsaı alady. Bir jyldaǵy qysqa merzimdik kezdesýleri segiz retke, uzaq kezdesýleri tórtke deıin uzartyldy», - deıdi ol. Maqala «Qylmystyq jaza qalaı izgilendiriledi?» degen taqyryppen berilgen.
«Aýyr atletıkadan álem chempıonatynyń besinshi kúni qazaqstandyqtar arasynan Irına Nekrasova men Jazıra Japarqul jarys jolyna shyqty. Biz aıtýly sportshylarǵa zor senim arttyq. Óıtkeni buǵan deıin Parıjde eki jerlesimiz ǵana baq synap, ekeýiniń de qanjyǵasy maılanǵan bolatyn. Alǵashynda Zúlfııa Chınshanlo altynnan alqa taǵynsa, ile-shala Maııa Maneza kúmis medaldi moınyna ildi. Sol jeńisti joldy 69 keli salmaq dárejesindegi Irına men Jazıra jalǵastyratyn shyǵar dep úmittendik», - dep jazady «Aıqyn» gazeti. Eýropa tórinde ótip jatqan baıraqty báseke jaıynda egjeı-tegjeıli bilgińiz kelse, basylymnyń túgingi nómirin jiberip almańyz.
***
«Kazahstanskaıa pravda» gazetiniń jazýynsha, keshe Qazaqstan Respýblıkasynyń Memlekettik hatshysy Qanat Saýdabaev EQYU-nyń Az ulttar isi jónindegi Joǵarǵy komıssary Knýt Vollebekti qabyldady. Kezdesý barysynda etnıkalyq qatynastar men az ulttar quqyǵyn qorǵaýdy úılestirý salasyndaǵy Qazaqstannyń EQYU-men yntymaqtastyǵyn odan ári nyǵaıtý máselesi talqylandy. EQYU-nyń az ulttar isi jónindegi Joǵarǵy komıssarynyń usynysyn eskere otyryp, Qazaqstanda sońǵy jyldary qoǵamdy odan ári toptastyrýǵa, etnosaralyq jáne konfessııaaralyq kelisimdi nyǵaıtýǵa, memlekettik organdardyń etnomádenı birlestiktermen ózara is-qımylynyń tıimdi júıesin qurýǵa, az ulttar tilderinde bilim júıesin jetildirýge baǵyttalǵan birqatar jobalar iske asyrylǵany atap ótildi.
