Aýyldyń jas kásipkeri myń qazdy baptap ósirip otyr - Qyzylorda oblysy
QYZYLORDA. QazAqparat - Balapan qazdar Aqsý aýylyndaǵy «Syr-Arna» fermerlik qojalyǵyna bıyl mamyr aıynda ákelinipti. Az ýaqyt ótkenine qaramastan mań basqan bala qazdar jersinip úlgirgen. Bul týraly QazAqparat tilshisi Jalaǵash aýdandyq ákimdigine silteme jasap habarlady.
Jalpy elý gektar alqapty alyp jatqan qus fermasy qurylysynyń búginde birinshi kezeńi aıaqtalyp, tórt qyzmetker turaqty túrde jumys jasap jatyr. «Syr-Arna» JShS qus fermasynyń basshysy Dáýlet Sárýardyń aıtýynsha, keshen tolyq iske qosylǵanda, toǵyz jańa jumys orny ashylyp, aýyl azamattarynyń birqataryn jumyspen qamtymaq.
Búginde «Syr-Arna» JShS-niń qus fermasynda Pavlodar oblysynan ákelingen myń bas qaz ósirilýde. Aldaǵy ýaqytta bul balapan qazdardyń eti, júni, baýyry satylymǵa shyǵarylmaq.
Bul kásip túri aımaq boıynsha alǵashqy ret qolǵan alynǵan biregeı joba. Jobany júzege asyryp otyrǵan jas jigittiń maqsaty - aımaq ekonomıkasynyń damýyna óz úlesin qosý. Sonymen birge, búgingi tańda naryq talabyna saı qus eti jáne jumyrtqasy erekshe suranysqa ıe bolyp otyr. Demek bul kásiptiń oń nátıje beretinine senim mol.
Óńirimizde qus etin óńdeıtin seriktestikter joqtyń qasy. Balapan qazdy baptaýǵa asa muqııattylyq ta qajet emes. Tek ýaqtyly jem-shóbin berip otyrsańyz bolǵany. Sharýa basyndaǵy mamandardyń sózinshe, qazdardyń súıip jeıtin jemi - jońyshqa men bıdaı. Muny da «Syr-Arna» JShS qolǵa alǵan. Mamyr aıynda ákelingen balapan qazdar ázirshe ónim bergen joq.
Bul qustardyń ereksheligi sol, aqpan men mamyr aılarynyń arasynda jumyrtqalaıdy eken. Ár qaz aıyna 30 jumyrtqa tabady. Bir ǵana qazdan jurtqa jumsaq et pen mamyq jastyq jasaý ıdeıasy óńirimizge tyń serpin beretini sózsiz. Qazdardyń salmaǵy 7-8 kelini quraıdy. Joba tolyq qýatyna kóshse, jylyna 12 tonna qaz eti, 400 kg qaz júni jáne 300 kg buqtyrylǵan qaz baýyrynan jasalǵan konservi jasamaq nıette.
