«Aýyldyń ornyn sıpap qalmaımyz ba?» - respýblıkalyq basylymdarǵa sholý
ASTANA. Sáýridiń 24-i. /QazAqparat/ Qazaq aqparat agenttigi respýblıkalyq basylymdarda sáýirdiń 24-i, senbi kúni shyqqan ózekti materıaldarǵa sholýdy usynady.
Memleket basshysy Nursultan Nazarbaevtyń Koreıa Respýblıkasyna sapary eki eldiń baılanysyn strategııalyq deńgeıge kóterip, Qazaqstanǵa ınvestıtsııa arnasynyń óse túsýine jol ashty. «Egemen Qazaqstan» basylymynyń búgingi sanynda jaryq kórgen «Bilim ekonomıkasy Koreı keremetiniń bir syry osynda jatyr» atty maqala Elbasynyń Koreıa Respýblıkasyna memlekettik saparyna nazar aýdarypty. «Nursultan Nazarbaevtyń Koreıa Respýblıkasyna memlekettik saparynyń úshinshi kúnindegi alǵashqy is-shara keshe tańerteń Koreı ýnıversıtetiniń ujymymen kezdesý boldy. Kezdesýdiń basynda ýnıversıtettiń ǵylymı keńesi Nursultan Nazarbaevqa Qurmetti ǵylym doktory ataǵyn berý jóninde biraýyzdan sheshim qabyldanǵany jarııa etilip, rektor hattamaǵa sáıkes doktor mantııasyn Elbasymyzǵa kıgizdi, ýnıversıtettiń altyn tósbelgisin taqty», - dep jazdy basylym.
Atalǵan taqyrypty arqaý etken maqalany «Aıqyn», «Alash aınasy» gazetteriniń búgingi sanynan da oqı alasyzdar.
"Parıjde boldym - Parıj túsime kirmedi. Mysyrda boldym - Mysyr túsime kirmedi. Qytaı, Mońǵolstan, Úndistan, Pákistan, Iran bardym. Muhıttyń arǵy betindegi Tehasta, Chıkagoda, Nıý-Iorkte boldym - olar da túsime kirmedi. Baıaǵyda Máskeýde bes jyl oqydym - ony da túsimde kórmedim ... Túsime kún saıyn Myńbulaq kiredi. Túsimde Aqsý-Jabaǵylyny kóremin" degen Sherhan Murtaza sózin epıgrafqa alyp, «Egemen Qazaqstan» gazetiniń búgingi sanynda Marhabat Baıǵuttyń «Aqsýym - arymdaı, Jabaǵylym - janymdaı...» atty maqalasy jaryq kóripti. Aty aıtyp turǵandaı, maqalada avtor elimizde eń birinshi qurylǵan qoryq Aqsý-Jabaǵyly týraly baıandaıdy.
Sondaı-aq atalǵan basylymnyń búgingi sanynda «Bos ákimshilik memlekettik laýazymdarǵa ornalasýǵa konkýrs týraly habarlandyrý» jarııalanypty.
***
«Aýyldyń ornyn sıpap qalmaımyz ba?» Osyndaı saýalmen «Alash aınasy» gazetiniń búgingi sanynda jaryq kórgen maqala aýyldyń búgingi basty máselelerin ortaǵa salypty. «Kezinde kóshpendiler jurty bolyp, keıinnen agrarly elge aınalyp, búginderi táýelsiz, ındýstrııaly memleket deńgeıine jetken elimiz qazir sol «týǵan topyraǵyn» umytyp ketken joq pa eken, degen oı týyndaıdy keıde. Óıtkeni kindik qanymyz tamǵan, yrys-berekeniń qazany, tilimiz ben rýhymyzdyń, dástúrimiz ben dinimizdiń túp qazyǵy - aýyldyń jaıy bárimizdi de kóp oılandyrady», - deıdi basylym.
Elbasy qaýlysymen bekitilgen Qazaqstan Respýblıkasynyń 2006-2016 jyldarǵa arnalǵan Genderlik teńdik strategııasyn júzege asyrý sheńberinde Almatynyń kósem áıelder klýbynyń tusaýkeser jıyny ońtústik astanada ótkizildi. Egjeı-tegjeıin «Alash aınasy» gazetiniń búgingi sanyndaǵy «Almatyda alǵash Kósem áıelder klýby jumysyn bastady» atty maqaladan oqı alasyzdar.
«Alash aınasy» gazetiniń dástúrli «Dat!» aıdarynda «Aýyl sharýashylyǵy - atústi jumys pen qaǵaz júzindegi esepti kótermeıtin sala» degen taqyryppen senator Qojahmet Baımahanovpen bolǵan suhbat jarııalanypty. Suhbatta senator aýyl sharýashylyǵyn damytýdaǵy ózekti túıinder tóńireginde oı órbitedi.
***
101 jastaǵy asyl áje Naǵıma Serǵalıeva Qostanaı óńirindegi tabıǵaty kórkem Meńdiqara aýdanynyń ortalyǵynda turady. Ol kisi 1908 jyly qarashanyń 10-ynda qaraǵaı aýylynda dúnıege kelipti. Ǵasyr jasaǵan ǵajap ana týraly «Aıqyn» basylymynyń búgingi sanynyń «Bárekeldi!» aıdarynan oqyńyzdar.
«Qandastarymyz «qytaılanyp» barady» Osy taqyryppen berilgen «Aıqyn» gezetindegi kelesi maqala qytaıdaǵy qazaq jurtynyń búgingi taǵdyryna nazar aýdarypty. «Qazaqstan Respýblıkasy Parlamenti Májilisiniń jalpy otyrysynda depýtat Qurmanǵalı Ýálı Premer-Mınıstr Kárim Másimovke saýal joldady. Aqıqatynda halyq qalaýlysynyń kóterip otyrǵan máselesi nazar aýdararlyqtaı eken. Depýtattyń aıtýynsha, «Nur Otannyń» qoǵamdyq qabyldaý bólimine, Qytaıdan kóship kelgen 96 qandasymyzdyń atynan hat túsken. Atap aıtsaq, búgingi tańda Qytaıda turatyn qazaqtarǵa, az ulttarǵa jeńildik jasaý arqyly qytaılandyrý saıasaty keńinen júrgizilip keledi», - dep jazdy basylym.
«Memleket quraýshy ult - qazaq ulty rýhanı ústemdikte bolýy kerek», - deıdi jazýshy Sabyrjan Shúkiruly «Aıqyn» gazetine bergen suhbatynda. Qoǵamnyń búgingi ózekti máseleleri tóńireginde jazýshymen oı bóliskińiz kelse, atalǵan basylymnyń «Aq sóıle» aıdaryna nazar aýdaryńyz.
***
Bıyl qazaqtyń mańdaıyna bitken jaryq juldyzy, ekinshi dúnıejúzilik soǵystyń dańqty jaýyngeri, halyq ózi qaharmen etken kórnekti jazýshy Baýyrjan Momyshulynyń týǵanyna 100 jyl tolyp otyr. Alqaly toıdyń betashary elorda tórinde bastaý alyp, «Baýyrjan Momyshuly tulǵasy: eldik pen erlik qundylyǵy» atty ǵylymı-praktıkalyq konferentsııa ótti. Al keshke Kongress-holl saraıynda «Ana tildiń aıbyny» atty merekelik kontsertte rýhty uldyń asyl beınesin asha túsetin arnaý óleńder oqyldy, beınefılm kórsetildi. Qazaqstannyń halyq jazýshysy Sherhan Murtazanyń «Noqtaǵa basy sımaǵan» dramalyq shyǵarmasynan úzindi oqyldy. «Astana aqshamy» basylymynyń búgingi sanynda jaryq kórgen «Birinshi Baýyrjannyń biregeı beınesi» atty maqala atalǵan is-sharalarǵa toqtalypty.
VII qysqy Azııa oıyndaryn ótkizý baqyty buıyrǵan elordanyń atalǵan oıynǵa daıyndyǵy qalaı? Burnaǵy kúni «Nur Otan» HDP Astana qalasy boıynsha fılıaly, Kedendik baqylaý departamenti men «VII qysqy Azııa oıyndaryn jáne Olımpıada alaýy estafetasyn ótkizý jónindegi qalalyq dırektsııasy» MQKK birlesip, daıyndyqtyń barysyn pysyqtady. Bul týraly tolyǵyraq «Astana aqshamy» gazetiniń búgingi sanynda jaryq kórgen «Azıada - eldiń abyroıy» atty maqaladan oqı alasyzdar.
