Aýyldyń medıtsınalyq obektilermen qamtamasyz etilýine baǵalaý júrgiziledi

NUR-SULTAN. QazAqparat - Aýyldyq eldi mekenderdiń medıtsınalyq obektilermen qamtamasyz etilýine baǵalaý júrgiziledi. Bul jaıynda Senat depýattarynyń resmı saýalyna oraı QR Premer-Mınıstri Asqar Mamınniń bergen jaýabynda aıtylǵan, dep habarlaıdy QazAqparat tilshisi.

«Densaýlyq saqtaý uıymdaryn medıtsına kadrlarymen qamtamasyz etý Densaýlyq saqtaý mınıstriniń 2010 jylǵy 7 sáýirdegi № 238 buıryǵymen bekitilgen óńirlerdi medıtsına qyzmetkerlerimen qamtamasyz etý normatıvterine sáıkes júzege asyrylady. Jyl saıyn medıtsına kadrlaryn daıarlaýǵa memlekettik bilim berý tapsyrysy bólinedi. Budan basqa, 2012 jyldan bastap medıtsınalyq mamandyqtar boıynsha memlekettik bilim berý tapsyrysy esebinen bilim alǵan bitirýshilerdiń úsh jyl boıy mindetti jumyspen óteý normasy engizildi. 2020 jylǵy 1 qańtarǵa klınıkalyq mamandyqtar kadrlarda qajettilik – 4 644 birlikti qurady, onyń ishinde aýylda – 912 birlik», - dedi Úkimet basshysy.

Onyń atap ótýinshe, aýyldyq eldi mekenderge jumys isteý jáne turý úshin kelgen jas mamandarǵa jergilikti atqarýshy organdar áleýmettik qoldaý kórsetedi. Bul klınıkalyq beıindegi kadrlar tapshylyǵyn 20 paıyzǵa tómendetýge múmkindik berdi.

«Kadrlardyń biliktiligi turaqty negizde artyp keledi. Bıyl 2 982 aýyldyq densaýlyq saqtaý mamandary daıarlandy. Sondaı-aq Úkimettiń 2020 jylǵy 30 shildedegi № 489 qaýlysymen bekitilgen pandemııa jaǵdaıynda qazaqstandyqtardyń ómiri men densaýlyǵyn qorǵaý jónindegi ulttyq josparǵa sáıkes halyqqa medıtsınalyq kómek kórsetý tıimdiligin arttyrý, densaýlyq saqtaý júıesi, ınfraqurylymdy nyǵaıtý, materıaldyq-tehnıkalyq jaraqtandyrý, tsıfrlandyrý jáne taǵy basqa bóliginde koronavırýstyq ınfektsııamen kúres jónindegi sharalar kesheni iske asyrylýda», - dedi Asqar Mamın.

Sonymen qatar ol «Jańa jaǵdaıdaǵy Qazaqstan: is-qımyl kezeńi» atty Memleket basshysynyń 2020 jylǵy 1 qyrkúıektegi Qazaqstan halqyna Joldaýynda aıtylǵan medıtsınalyq-sanıtarlyq alǵashqy kómek tásilderin joǵary utqyrlyq jáne halyqtyń qalyń kópshiligine, onyń ishinde aýyldyq jerde turatyndarǵa qoljetimdi bolýy jaǵyna qaraı túbegeıli qaıta qaraý jónindegi tapsyrmany oryndaý úshin aýyldyq eldi mekenderdiń medıtsınalyq obektilermen qamtamasyz etilýine baǵalaý júrgiziledi. Jumys nátıjesi boıynsha aýyl turǵyndaryna medıtsınalyq-sanıtarlyq kómek kórsetýdi jaqsartý boıynsha tıisti sharalar qabyldanatyn bolady. Aýyl halqyn qoljetimdi medıtsınalyq kómekpen qamtamasyz etý jáne aýyldyq densaýlyq saqtaý ınfraqurylymyn damytý máseleleri Úkimettiń erekshe baqylaýynda», - dep tolyqtyrdy Premer-Mınıstr.