Aýyldyń aýasymen tynys alǵan Dımashqa qalǵan 7 kezeń ońaı bolady - ata-anasy
AQTÓBE. QazAqparat - Aqtóbege Dımash Qudaıbergen keldi. Qytaıdaǵy «Singer-2017» án baıqaýynda baq synap jatqan qazaq ánshisin kútip alǵandar arasynda onyń ata-anasy Qanat pen Sveta Aıtbaevtar da boldy, dep habarlaıdy QazAqparat tilshisi.
Dımash Qudaıbergendi kútip alý úshin aqtóbelikter bir saǵat buryn halyqaralyq áýejaıǵa jınaldy. Olardyń aralarynda Dımash bilim alǵan mektep pen mýzykalyq kolledjdiń ujymy jáne stýdentter júr. Eriktiler Dımashtyń ánin súısine tyńdap, qoldaý bildirip júrgen múgedek jandardy da ertip ákeldi.
«Dımashty kútip alýǵa oblys ákimi Berdibek Saparbaev pen qala ákimi Іlııas Ispanovtyń ózi keldi. Bul úshin alǵys aıtamyz. Dımashpen birge «Hunan» telearnasynyń túsirý toby Aqtóbede bolady. Olar erteń Aqtóbe qalasynyń kórikti jerlerin aralap, mektepke, mýzykalyq kolledjge barady. Ony ata-anasy saǵyna kútti»,- dedi Dımashtyń ákesi Qanat Aıtbaev.
Ulyn kútýge áýejaıǵa Sveta Aıtbaeva da kelip, aqtóbelikterge rızashylyǵyn bildirdi.
«Óńir halqyna alǵysymyz sheksiz. Janynda júrgen Alpamys dosyna, Astanada birge oqyǵan barlyq dostaryna alǵys aıtamyn. Olar qoldap, únemi janynan tabyldy. Úıde atasy men ájesi kútip otyr. Biz shydaı almaı, áýejaıǵa keldik»,-dedi Svetlana Aıtbaeva.
Dımash ózine Djekı Chan syılaǵan kúrtemen Aqtóbege keldi. Janynda bir top telearna qyzmetkeri bar.
«Dımash baıqaýdyń teń jartysynan ótti. Aýyldyń aýasymen tynystaǵan soń qalǵan 7 kezeń oǵan ońaı bolady dep oılaımyz»,- dedi Svetlana Aıtbaeva.
