Aýyldyń áleýetin anyqtaýdyń jańa ádisteri ázirlendi – Jeńis Qasymbek

NUR-SULTAN. QazAqparat – Aýyldardyń áleýetin anyqtaýdyń jańa ádisteri ázirlendi. Bul týraly QR Premer-Mınıstriniń orynbasary Jeńis Qasymbek málim etti, dep habarlaıdy QazAqparat tilshisi.

«Aýyl – el besigi» jobasy aıasynda halyqaralyq sarapshylarmen birigip jáne óńirlermen birge aýyldardyń áleýetin anyqtaýdyń jańa ádisterin ázirledik. Nátıjesinde damý áleýeti bar 3,5 myń aýyl irikteldi. Bul aýyldarda 6,6 mln adam nemese aýyl halqynyń 85 paıyzy turady. QR Prezıdenti Q.Toqaevtyń tapsyrmasymen «Aýyl – el besigi» jobasyn iske asyrýǵa 2020-2022 jyldary qosymsha 90 mlrd teńge bólinedi», - dedi Jeńis Qasymbek búgin Memleket basshysynyń Qazaqstan halqyna Joldaýyn talqylaýǵa arnalǵan Úkimet otyrysynda.

Jeńis Qasymbek el Prezıdenti jerdi tıimdi paıdalanýdy qamtamasyz etý mindetin qoıǵanyn aıtty. Bul oraıda tıimsiz jer paıdalanýshylardan jerleri qaıtaryp alý týraly Memleket basshysynyń tapsyrmasyn oryndaý úshin ortalyq, oblystyq, aýdandyq baqylaýdyń biryńǵaı vertıkali qurylady.

«2021 jylǵa qaraı sýarmaly jerlerdiń aýdany 2,1 mln gektardy quraıdy. Bul rette onyń kólemi 2 ese artyp, 1,8 trln teńgeden asady. Prezıdenttiń tapsyrmasyna sáıkes 2030 jylǵa qaraı sýarmaly jerler aýdany 3 mln gektarǵa deıin jetedi. Bul mal sharýashylyǵy men ósimdik sharýashylyǵynda naqty ósimdi qamtamasyz etýge múmkindik beredi», - dedi vıtse-premer.