Aýyldyń adal polıtseıi jaıly otandyq vestern prokatqa shyǵady
ASTANA. QazAqparat - 2018 jyldyń 1 qarashasynan bastap vestern janrynda túsirilgen «Satash» fılmi otandyq prokatqa shyǵady, dep habarlaıdy QazAqparat tilshisi «Qazaqfılm» kınostýdııasyna silteme jasap.
Fılmniń rejısseri -stsenarıst jáne jýrnalıst Tólegen Baıtókenov. Sh.Aımanov atyndaǵy «Qazaqfılm» kınostýdııasy QR Mádenıet jáne sport mınıstrliginiń tapsyrysy boıynsha túsirilgen kartına qylmyskerlermen shaıqasqa túsken aýyldyń adal Satash esimdi ýchaskelik polıtseıi týraly baıandaıdy. Ol aýyldy basyp alǵan qylmyskerlerge jalǵyz ózi tótep berip, boryshyn sońyna deıin óteıdi.
Fılmdegi basty rólderdi Aqylhan Almasov, Dına Tasbolatova, Shyńǵys Qapın jáne Erjan Núsipaqynovtar somdaıdy. Urys sahnalaryn qoıý Bahadyr Jalmetov pen «Jal» kaskaderler qaýymdastyǵyna júktelgen. Túsirilim jumystary Almaty oblysy, Qapshaǵaı qalasynan 40 km shaqyrymda ornalasqan Brıgadır aýylynda ótken.
Esterińizge sala ketsek, «Satash» fılmi jaqynda ǵana qazannyń 12-21 aralyǵynda ótken 34-shi Varshava kınofestıvaliniń konkýrstyq baǵdarlamasyna qatysqan bolatyn.
Rejısser Tólegen Baıtókenovtyń aıtýynsha, fılmdi tamashalaǵan polshalyq kórermender men túrli elden kelgen BAQ ókilderi jyly lebizderin bildirip, kartınanyń unaǵanyn jasyrmaǵan.
«Atalǵan kınotýyndy ásemdiligimen erekshelenedi. Fılmde bári úılesimdi, ár kadrlary oryndy, erekshe atmosferaǵa toly, oqıǵa jelisi de qyzyqty. Fılmniń sońy da oıdaǵydaı aıaqtalady, ár kompozıtsııasy este qalarlyq. Bul naǵyz zamanaýı vestern», - deıdi SLANT Magazine atty amerıkalyq tanymal basylymynyń kınosynshysy Chak Boen.
