Aýyldyń 200 myń turǵyny dáriger kómegin ala almaı otyr
NUR-SULTAN. QazAqparat - 800-den astam aýyldyń 200 myń turǵyny medıtsınalyq kómekten qaǵylyp otyr. Bul týraly búgin Senattaǵy "Óńir" depýtattyq tobynyń otyrysynda QR Densaýlyq saqtaý vıtse-mınıstri Lázzat Aqtaeva aıtty, dep habarlaıdy QazAqparat tilshisi.
Onyń atap ótýinshe, medıtsınalyq kómektiń qoljetimdiligin arttyrý maqsatynda alǵashqy medıtsıalyq-sanıtarlyq kómek uıymdaryn úlkeıtý jumystary júrgizilip jatyr. Máselen, sońǵy 2 jylda óńirlerde 214 nysan paıdalanýǵa berilse, onyń 67-si jeke ınvestıtsııa esebinen salynǵan. Degenmen, Pavlodar, Qostanaı, Qyzylorda, Atyraý, Jambyl, SQO, ShQO, BQO jáne Aqmola oblystarynda alǵashqy medıtsınalyq-sanıtarlyq kómek nysandarynyń ǵımarattary eskirip ketken.
"Sonymen qatar birqatar óńirde medıtsınalyq tehnıkamen jabdyqtaý deńgeıi tómen jáne olar jyldan jylǵa tozyp barady. Buǵan qosa, 200 myńnan astam adam turatyn 846 aýyldyq eldi mekende medıtsınalyq nysan joq. Osylaısha, birqatar óńir ınfraqurylymdy jańǵyrtý boıynsha jetkilikti sharalar qabyldamaı otyr. Máselen, nysandardyń tozýy 80 paıyzdan asyp ketken Aqmola oblysynda sońǵy 2 jylda nebári 3 densaýlyq saqtaý nysany, nysandarynyń tozý kórsetkishi 70 paıyzdan asyp jyǵylatyn jáne 93 eldi mekeninde medıtsınalyq uıymy joq Shyǵys Qazaqstan oblysynda 1 ǵana nysan salynǵan", - dedi vıtse-mınıstr.
L.Aqtaevanyń aıtýynsha, óńir ákimdikteri aldaǵy 3 jylda 120 mlrd teńgeden astam somaǵa 595 alǵashqy medıtsınalyq-sanıtarlyq kómek nysanyn salýdy josparlap otyr. Munan bólek, 228 nysanǵa kúrdeli jóndeý jumystary júrgizilip, olardy 11 myńnan astam medıtsınalyq tehnıkamen jabdyqtaý kózdelgen.
"Búgingi kúni medıtsınalyq tehnıkamen jabdyqtaýǵa jáne kúrdeli jóndeý jumystaryn júrgizýge qosymsha 22 mlrd teńgeden astam qarajat qajet. Biraq, jekelegen óńirlerde aǵymdaǵy qajettilikti jabý úshin nysandardyń sany jetkiliksiz. Osyǵan baılanysty óńir ákimderi densaýlyq saqtaý ınfraqurylymdaryn damytýdyń óńirlik perspektıvali jospary aıasyda halyqqa alǵashqy kómektiń qadamdyq qoljetimdiligin qamtamasyz etýdi eskere otyryp, jumystardy jalǵastyrý qajet", - dedi ol.
